Ապրիլյան պատերազմի եւ դրան հաջորդող օրերին ԵԱՀԿ բազմաթիվ պետություններ հանդես են եկել հայտարարություններով՝ գրավոր ու բանավոր, որ Ադրբեջանի կողմից 1994 թվականի զինադադարի մասին պայմանագրի խզմանն ուղղված քայլերն անընդունելի են: Այս մասին այսօր՝ ապրիլի 26-ին, լրագրողների հետ զրույցում ասել է ԱԺ փոխոխոսնակ Հերմինե Նաղդալյանը:

Նրա խոսքով, միջազգային հանրությունն այսօր տեսնում է հնարավորություն՝ վերադառնալու բանակցություններին՝ զենքի չօգտագործմամբ, սահմանին հետաքննական մեխանիզմի ներդրմամբ: «Միջազգային հանրությունը այսօր տեսնում է Մինսկի խմբի բանակցային գործընթացին վերադարձ եւ այդ գործողությունների կատարում, այսինքն` զենքի չօգտագործման պարտավորություններ է սահմանում, միջադեպերի հետաքննման մեխանիզմներ եւ այլն»,-ասաց Նաղդալյանը:

Նրա կարծիքով այսօր Ադրբեջանը իր դեմքը պահելու խնդիր ունի եւ որոշ գործողություններ լինելու են նաեւ այդ լույսի ներքո: «Շատ կարեւոր է, որ լինի միջազգային հանրության միահամուռ եւ հետեւողական մոտեցումները, Մինսկի խմբի միահամուռ վերաբերմունքը այս գործողություններին»,-ընդգծեց ԱԺ փոխնախագահը՝ հավելելով, որ Ադրբեջանը դիմել է ՄԱԿ՝ 1994 թվականի հրադադարի մասին պայմանագիրը չեղարկելու համար, որովհետև հասկանում է, որ խնդրի կարգավորման շուրջ ստեղծված դրությունն իր օգտին չէ։