Ադրբեջանի հարձակումը Արցախի Հանրապետության դեմ օրակարգային դարձրեց Հայկական զինված ուժերի սպառազինության արդիականացման հարցը: Այս մասին այսօր՝ ապրիլի 26-ին, ԱԺ-ում հայտարարությունենրի ժամին իր ելույթում նշել է Զարուհի Փոստանջյանը:
Նա, մասնավորապես, նշել է. «Ադրբեջանի հարձակումը Արցախի Հանրապետության դեմ օրակարգային դարձրեց Հայկական զինված ուժերի սպառազինության արդիականացման հարցը, որը ռազմատեխնիկական բաղադրիչի ոչ բավարար լինելու հետեւանք է: Այս պահին ժամանակավրեպ համարելով անդրադառնալը 80-ականների զենքով 2016 թվականին կռվելու բացահայտված իրողության հիմնավոր քննադատությունը` կարեւոր նշանակություն է ստանում ներկա պատերազմական իրադրության պայմաններում Հայկական զինված ուժերի սպառազինության արդիականացումը:
Երբ այս օրերի ընթացքում կոչ էր արվում միասնության, «անպարտելի համախմբման» եւ այլն, դրանք հիմնական կյանքի կոչողը եղավ հանրությունը` իր ինքնակազմակերպվածության եւ գործնական հայրենասիրության շնորհիվ: Հերթը իշխանությանն է, որն այս պատերազմական օրերին առնվազն պարտավոր է միջոցներ տրամադրել` հնարավորինս արդիականացնելու բանակի սպառազինությունը եւ իրական տեսանելի աջակցություն ցուցաբերել մեր զոհված եւ վիրավոր բոլոր զինծառայողների եւ կամավորների ընտանիքներին:
Այո՛, հայ հասարակությունը եւ հայ զինվորը այսպիսի էքստրեմալ պայմաններում հանդես եկավ հերոսաբար: Հայ զինվորը զոհաբերեց իրեն պատկանող միակ անգին ունեցածը՝ իր կյանքը: Մեր իշխանավորների հարստությունը գնահատվում է միլիարդավոր դոլարներ, եկել է ժամանակը նաեւ նրանց կողմից ցույց տալու իրենց պարտադիր բաժին մասնակցությունը այս պատերազմում:
Այդ հրատապ հրամայականի ներքո իշխանավորները՝ պետական բարձրաստիճան պաշտոնյաները եւ նրանց ընտանիքների անդամները, որոնց թիվը կազմում է շուրջ հինգ հարյուր մարդ, ովքեր անհիմն, ապօրինի հարստացել են, պարտավոր են օր առաջ հանրությունից հափշտակած միջոցները՝ միլիարդավոր դոլարները, հետ վերադարձնել հանրությանը:
Բազմաթիվ լրջագույն ձախողումներ արձանագրած ոչ օրինակարգ իշխանությունը, եթե լրջություն չցուցաբերի այս կարեւորագույն հարցում, չհամալրի հայկական զինված ուժերը ժամանակակից սպառազինությամբ, ապա պետք է սպասի ոչ միայն արտաքին ռազմաճակատում հերոսության արձանագրմանը, այլեւ ներքին ճակատում արդարության վերականգնմանը:
