Ղարաբաղյան հակամարտության կողմերի միջեւ համաձայնության ձեռք բերման լավագույն ուղիների որոնմանն աջակցությունը շարունակվել է՝ հասանելի բոլոր գործիքների գործադրմամբ, այդ թվում՝ բարձր եւ բարձրագույն մակարդակով հանդիպումների: Այս մասին ասված է Ռուսաստանի 2015 թվականի արտաքին քաղաքական գործունեության մասին այդ երկրի ԱԳՆ-ի պատրաստած ամփոփագրում:
Համապատասխան նախաձեռնությունները մանրամասն քննարկվել են Ռուսաստանի նախագահի՝ Երեւան (ապրիլ) եւ Բաքու (հունիս) կատարած այցերի ընթացքում: Շարունակվել է արտգործնախարարների մակարդակով ինտենսիվ երկխոսությունը:
ԵԱՀԿ Մինսկի խմբի համանախագահների (ԱՄՆ եւ Ֆրանսիա) հետ սերտ փոխգործակցությամբ 7 հանդիպում է անցկացվել Հայաստանի եւ Ադրբեջանի ղեկավարության հետ, ինչպես նաեւ մի շարք խորհրդակցություններ՝ ԱԳ նախարարների մասնակցությամբ, շփումներ են եղել Լեռնային Ղարաբաղի իշխանությունների հետ:
Բելգրադում (դեկտեմբեր) ԵԱՀԿ ԱԳ նախարարների խորհրդի նիստում Ռուսաստանի, ԱՄՆ-ի եւ Ֆրանսիայի պատվիրակությունների ղեկավարների հայտարարությունում կողմերին համառորեն կոչ է արվել հաստատել հակամարտության խաղաղ կարգավորմանը հավատարմությունը եւ շարունակել աշխատանքը՝ ուղղված գոյություն ունեցող առաջարկների հիման վրա համպարփակ կարգավորման ձեռքբերմանը: