Ընտրական օրենսգրքի նախագիծն նպաստելու է իշխանության մենաշնորհին: Այս մասին ապրիլի 27-ին ԱԺ-ում ասել է պատգամավոր Վարդան Օսկանյանը:
Նրա խոսքով փաստաթուղթը պետք է արտացոլի ընտրական համակարգին անհրաժեշտ բարեփոխումների ոչ միայն ձեւը, այլեւ բովանդակությունը: «Երկու տասնամյակ Հայաստանում ընտրությունները կեղծվել են: Ընտրակաշառք են բաժանել, «կառուսելներ» պտտել: Բազմակի քվեարկություններ անցկացրել, լցոնումներ, կաշառքներ: Օրենքի տառով օրենսգրքի այս նախագիծը գուցեեւ լուծում է այդ խնդիրները: Իսկ ոգով՝ բացարձակապես ոչ: Հիմա մեր երկրում միամանդատ համակարգով խորհրդարանոմ 41 պատգամավոր է ընտրվում: Դա ինքնին վա՞տ է: Ոչ: ԱՄՆ-ում ամբողջ կոնգրեսն է ընտրվում միամանդատ համակարգով: Բայց մեր երկրում այդ 41 տեղից առնվազն 35-36-ը ստանում է իշխանական կուսակցությունը, իսկ մնացած 5-6 տեղերը՝ ըստ պայմանավորվածության՝ մյուս կուսակցությունների միջեւ են բաշխում»,- ասել է Օսկանյանը, որն իր հիշատակած ընտրախախտումների ժամանակ արտգործնախարարի պաշտոնն էր զբաղեցնում ու այս թեմայի շուրջ լռություն պահպանում:
Հիմա արդեն ընդդիմադիր դարձած պատգամավորը նշեց, որ Սահմանադրության բարեփոխումը նպատակ ուներ լուծել այդ հարցը, բայց արդյունքում ավելի վատացրել է իրավիճակը: Առաջ այն մարդը, որը կաշառք էր վերցնում, գոնե կարող էր քվեարկել եւ իշխանական միամանդատ թեկնածուի, եւ միաժամանակ՝ ընդդիմադիր կուսկացության օգտին: «Իսկ հիմա, քվեարկելով մի թեկնածուի օգտին, նա արդեն ստիպված է լինելու քվեարկել նաեւ նրա կուսակցության օգտին:Այսպիսով թեկնածուները տեղերում կկարողանան կաշառել ընտրողներին ոչ միայն իրենց, այլեւ իրենց կուսակցությունների օգտին»,- ամփոփել է Վարդան Օսկանյանը:
