Այն, ինչ ձեռնտու չէ Ադրբեջանին, նա նախընտրում է «չիմանալ»: Այդ մասին ապրիլի 27-ին Հայաստանի կառավարական ժամին հայտնել է Հայաստանի արտգործնախարար Էդվարդ Նալբանդյանը:
«Դուք նույնիսկ չեք պատկերացնում, թե Վիեննայում ինչ պատասխան հնչեց մեր հարցին, երբ հարցրեցինք ադրբեջանական դեսպանի` ԵԱՀԿ-ի Մինսկի խմբի համանախագահներին ուղղված նոտայի մասին, որում կասկածի էր առնված հրադադարի վերաբերյալ համաձայնագրի իրավազորությունը: Բարձր մակարդակով պատասխան հնչեց, որ դեսպանը նման հանձնարարություն չուներ եւ ինքնակամ էր հանդես եկել, առանց Բաքվի հետ համաձայնեցնելու: Իհարկե պարզ է, թե ինչու է արվում դա. խուսափելու անպատասխանատու քայլերի համար պատասխանատվությունից: Գողի գլխին գլխարկն այրվում է: Առաջին անգամը չէ, երբ նրանք չեն ուզում ինչ-որ բանի մասին խոսել եւ ձեւացնում են, թե չգիտեն այդ մասին:
Նրանք «չգիտեին», թե ինչ գործողություններ են սանձազերծվել Արցախի (Լեռնային Ղարաբաղի) դեմ եւ քանի զոհ են տվել իրենց արկածախնդրության հետեւանքով, «չգիտեին» միջադեպերի հետաքննության մեխանիզմի վերաբերյալ առաջարկների մասին: «Չգիտեն» Լեռնային Ղարաբաղի վերաբերյալ ԵԱՀԿ-ի Մինսկի խմբի համանախագահների 5 հայտարարության մասին:
Կարող ենք նրանց հիշեցնել, որ չիմանալը չի ազատում պատասխանատվությունից: Եկել է ժամանակը, որ միջազգային հանրությունը կոնկրետ քայլեր ձեռնարկի Ադրբեջանին պատասխանատվության կանչելու եւ կառուցողական դաշտ վերադարձնելու: Այդ դեպքում հնարավոր կլինի նաեւ շարունակել բանակցային գործընթացը: Իսկ այսօր մեր քննարկումները եւ հանդիպումները վերաբերում են նրան, թե ինչպես վերացնել Ադրբեջանի ագրեսիայի հետեւանքները», - հայտնել է Նալբանդյանը: