Եթե Թուրքիան հետեւի Եվրամիության անհրաժեշտ չափանիշներին, վիզային ռեժիմի ազատականացման ճանապարհին Անկարան Եվրահանձնաժողովի կողմից որեւէ խոչընդոտի չի հանդիպի: Ըստ «Ինտերֆաքս»-ի, այս մասին հայտարարել է ԵՄ արտաքին գործերի եւ անվտանգության քաղաքականության հարցերի գերագույն հանձնակատար Ֆեդերիկա Մոգերինին:
«Եթե բոլոր չափանիշներն իրականացվեն, մենք կգնանք ազատականացմամբ, ինչպես դա արվեց այլ երկրների պարագայում: Հանձնաժողովի առաջարկը միանգամայն հետեւողական է: Եթե պահանջները չիրականացվեն, դա տեղի չի ունենա»,- ասել է Մոգերինին:
Նա նաեւ նշել է, որ հստակ կապ կա երկրի կողմից եվրոպական արժեքների հարգման եւ վիզային ռեժիմի ազատականացման միջեւ: «Մեր դիրքորոշումը շարունակում է խիստ մնալ: Թուրքիան պետք է ամբողջությամբ հարգի Եվրամիության եւ միջազգային կազմակերպությունների սկզբունքներն ու արժեքները: Մենք Թուրքիայից ակնկալում ենք, որպեսզի ամբողջությամբ հարգի այդ արժեքները: Եվ այդ մասին մենք հստակ հայտարարել ենք Անկարայի հետ երկխոսության ժամանակ»,- ամփոփել է ԵՄ-ի պաշտոնյան: