Հայոց ցեղասպանության փաստն անիմաստ է վիճարկել, քանի որ այն ամբողջովին ապացուցված է։ Այս մասին ԱՄՆ Կոնգրեսում Ցեղասպանությանը նվիրված երեկոյի ժամանակ ասել է կոնգրեսական Ռոբերտ Դոլդը, փոխանցում է NEWS.am-ի թղթակիցը։
«Ընդամենն անհրաժեշտ է լույս սփռել պատմության փաստերի վրա։ Եթե դա կարծիքի հարց լիներ, եթե կասկածներ լինեին այդ փաստի իսկության մեջ, դա այլ բան։ Բայց մենք մեր ձեռքում փաստեր ունենք, լուսանկարներ, ապացույցներ, այդ Ցեղասպանությունը վերապրած իրական մարդկանց, ընտանիքների վկայություններ»,- ասել է կոնգրեսականը։
Նրա խոսքով՝ ինքը շատ ժամանակ է ծախսել հարցն ուսումնասիրելու համար, զրուցել է Ցեղասպանության սարսափի միջով անցած մարդկանց, ընտանիքների հետ։ «Կասկած չկա։ Օսմանյան կայսրությունը համակարգված ջարդեր էր կազմակերպում՝ նպատակ ունենալով ջնջել հայ ժողովրդին երկրի երեսից։ Սակայն ձեր ներկայության փաստն արդեն լավագույն ապացույցն է, որ այդ պլանները ձախողվել են»,- ասել է կոնգրեսականը՝ նշելով, որ ԱՄՆ-ը պարտավոր է ճանաչել Հայոց ցեղասպանությունը, քանի որ դրա չճանաչումը հանցագործության կրկնության վտանգ է պարունակում։
