«Հեպատիտ Ց»-ի գործով քննությունը վերսկսվել է: Այս մասին NEWS.am-ի թղթակցին ասաց գործով ամբաստանյալ, հիվանդանոցի բժիշկ-անեսթեզիոլոգ Երվանդ Ավագյանի փաստաբան Սեյրան Ազիզյանը:
«Առաջին նիստն արդեն եղել է, ապացույցների հետազոտման կարգն է սահմանվել, որից հետո նիստը հետաձգվել է եւ նշանակվել հունիսի 2-ին»,- ասաց Սեյրան Ազիզյանը:
Նշենք, որ այս գործը Սյունիքի մարզի ընդհանուր իրավասության դատարան էր ուղարկվել դեռեւս անցած տարվա նոյեմբերին: Դեպտեմբերին սկսված դատաքննությունը ընդհատվել էր, քանի որ դատավոր Նապոլեոն Օհանյանն ամենամյա արձակուրդի էր մեկնել: Այս տարվա մարտին գործը մակագրել էր դատավոր Անդրանիկ Մնացականյանը, որն էլ առաջին նիստի օր էր նշանակել ապրիլի 21-ին:
Հիշեցնենք, որ ըստ մեղադրական եզրակացության՝ Քաջարանի ԲԿ-ի նախկին տնօրեն Վարդան Ավագյանը, փոխտնօրեն Վիրաբ Մանասյանը, բժիշկ-անեսթեզիոլոգ Երվանդ Ավագյանը, ավագ բուժքույր Նորա Կարապետյանն ու գլխավոր բուժքույր Արմեդա Վանեսյանը խախտել են սանիտարահամաճարակային անվտանգության կանոնները: Նրանց գործունեության հետեւանքով առաջացել է մարդկանց վիրուսային «Հեպատիտ Ց», ինչի հետեւանքով մի շարք քաղաքացիների առողջությանը անզգուշությամբ պատճառվել է կյանքին վտանգ սպառնացող ծանր վնաս:
5 բուժաշխատողներին էլ մեղադրանք է առաջադրվել Քրեական օրենսգրքի 277-րդ հոդված 2-րդ մասով, այն է՝ սանիտարահակահամաճարակային կանոնները խախտելը, որն անզգուշությամբ ծանր վնաս է պատճառել մարդու առողջությանը կամ առաջացրել է մարդու մահ: Այս հոդվածը նախատեսում է ազատազրկում՝ առավելագույնը հինգ տարի ժամկետով: Խափանման միջոց է ընտրվել ստորագրություն չհեռանալու մասին: