Օդեսայի մարզի նահանգապետ Միխայիլ Սաակաշվիլին Ուկրաինայի ներքին գործերի նախարար Արսեն Ավակովին մեղադրել է կաշառակերության եւ ստախոսության համար: Այդ մասին Վրաստանի նախկին նախագահը գրել է Facebook-ի իր էջում:
«Մեկ անգամ չէ, որ նրան բռնացրել են կաշառակերության եւ ստախոսության մեջ, Յացենյուկի մնացորդն է ՆԳՆ նախարարը, շարունակում է խաղալ ազգային անվտանգության թեմայի հետ: Նա ստում է, երբ ասում է, թե նախագահն իմ խնդրանքով որոշում չի ընդունել Օդեսա Ազգային գվարդիայի լրացուցիչ ուժեր մտցնելու մասին», — ասել է Սաակաշվիլին:
Նա հավելել է, որ Ուկրաինայի ՆԳՆ-ի ղեկավարությունից պաշտոնական ներողություն է սպասում:
Ապրիլի 27-ին Արսեն Ավակովի խորհրդական Զորան Շկիրյակը հայտնել է, որ Օդեսայի մարզի նահանգապետ Միխայիլ Սաակաշվիլիի հայտարարությունն այն մասին, թե որոշել են Ազգային գվարդիայի մինչեւ հազար զինվոր ուղարկել Օդեսա, չի համապատասխանում իրականությանը: Ավելի վաղ նա նախագահ Պյոտր Պորոշենկոյին խնդրել էր ուժային ստորաբաժանումներ մտցնել քաղաք, նշելով, որ Ուկրաինայում արձանագրում է պետության անկման բոլոր նշանները:
Անցյալ տարվա դեկտեմբերի 14-ին Ուկրաինայի Բարեփոխումների ազգային խորհրդի նիստին Ավակովի եւ Սաակաշվիլիի միջեւ բացահայտ հակամարտություն էր տեղի ունեցել: Ներքին գործերի նախարարը եւ Օդեսայի մարզի նահանգապետը միմյանց մեղադրել էին կաշառակերության համար եւ վիրավորել էին: Վեճի ընթացքում Ավակովը Սաակաշվիլիի ուղղությամբ ջրով բաժակ էր նետել Ուկրաինայի նախագահը միջադեպն ամոթալի է կոչել:
