Վայոց Ձորի մարզի Գլաձոր եւ Վերնաշեն համայնքների անունները միայն կարելի է համարել մրցակցային առավելություն: Վերնաշեն անվանմամբ գինու բրենդի հայտնի լինելը նպաստում է արտադրված գինու արագ վաճառքին: Մյուս առավելություններից են նաեւ Երեւան-Մեղրի միջպետական ավտոճանապարհին եւ Եղեգնաձոր քաղաքին մոտ գտնվելը, աշխատասեր բնակիչների շնորհիվ ապահովվող բարձր բերքատվությունը: Այդ ամենը հնարավորություն է տալիս, որպեսզի գլաձորցիները եւ վերնաշենցիները հեշտությամբ իրացնեն իրենց արտադրանքը Եղեգնաձորի շուկայում, ինչպես նաեւ` ավտոճանապարհի երկայնքով տեղակայված առեւտրի կետերում:
«Հայաստանի ՓՄՁ զարգացման ազգային կենտրոն» (ՓՄՁ ԶԱԿ) հիմնադրամից NEWS.am-ին հայտնում են, որ այդ համայնքների անդամները մի քանի շաբաթ շարունակ Հայաստանի ՓՄՁ զարգացման ազգային կենտրոնի եւ նրա գործընկեր կազմակերպությունների ներկայացուցիչների հետ համատեղ ջանքերով քննարկել են իրենց հայրենի բնակավայրերի մրցակցային առավելությունները, վերհանել խնդիրները եւ առաջարկել դրանց լուծումները: Մրցակցային առավելություննրի մասնակցային գնահատում (PACA) ծրագիրը համայնքներում իրականացվել է ԱՄՆ ՄԶԳ ֆինանսավորմամբ` Հայաստանի ՓՄՁ ԶԱԿ-ի եւ գործընկեր կազմակերպությունների կողմից իրականացվող «Գործընկերություն` հանուն գյուղական համայնքների բարգավաճման» (USAID/PRP) ծրագրի շրջանակում:
Մասնագետների գնահատմամբ` այդ համայնքների համար զարգացման ռազմավարական ճյուղերն են այգեգործությունը, խաղողագործությունը հացահատիկի մշակումը Բուռն զարգանում են զբոսաշրջությունը եւ գյուղմթերքի մշակումը: Այդուամենայնիվ, զարգացած համարվող խաղողագործության ճյուղի մեջվնկատվում է անկում: Մարդիկ մշտապես խնդիրներ են ունենում մթերման հետ կապված: Դրանից բացի, համայնքների բնակիչները չեն ցանկանում սկսել գինու լիցենզավորված արտադրություն: Հանդիպման ընթացքում փորձագետները համայնքի ներկայացուցիչներին տրամադրեցին նաեւ PACA գրքույկը: Այնտեղ ներկայացված են համայնքների նկարագիրը, զարգացման առաջնահերթությունները, մրցակցային առավելությունները, խնդիրները եւ առաջարկությունները:
Հանդիպման ավարտին ԱՄՆ ՄԶԳ «Գործընկերություն` հանուն գյուղական համայնքների բարգավաճման» (USAID/PRP) ծրագրի ղեկավարի պաշտոնակատար Լիլիթ Ափուջանյանը ներկայացրեց ծրագրի, ինչպես նաեւ Հայաստանի ՓՄՁ ԶԱԿ-ի զարգացման այլ գործիքները եւ հորդորեց գործարարության հետ առնչվող բոլոր հարցերով դիմել Հայաստանի ՓՄՁ ԶԱԿ-ի Վայոց Ձորի մասնաճյուղին: