Ընտրակեղծիքից ամենաշատը բողոքում են նախկինում բարձրաստիճան եղած մարդիկ, որոնք իրենց պաշտոնավարման ժամանակ եղել են կեղծումների կազմակերպիչ, ակտիվիստների, լրատվամիջոցների դեմ անձամբ են հետապնդումներ իրականացրել: Այս մասին այսօր՝ ապրիլի 28-ին, ԱԺ-ում Ընտրական օրենսգրքի նախագծի քննարկումների ժամանակ հայտարարեց պատգամավոր Նիկոլ Փաշինյանը:
«Երբ ընտրությունները կեղծելու արդյունքում արտոնություններ պետք է ստանային, ծառայողական ավտոներ, կաբինետներ, բողոք չունեին, երբ նույն ընտրակեղծիքների արդյունքում այդ ամենից զրկվել են, սկսել են կեղծարարության դեմ պայքարի Ալեքսանդր Մատրոսով դառնալ: Ընտրություններում փող եւ մուրաբա բաժանողները ազգի դավաճան են հանում ընտրություններում փող ու տուկի թել բաժանողներին, իսկ փող ու տուկի թել բաժանողները դատափետում են փող ու ատամի պրոթեզ բաժանողներին: Բայց ինձ ամենաշատը դուր եկան այն ելույթները, որոնց հեղինակները կսկիծ էին հայտնում դորդ ջհար բանակցային ֆորմատի իքիբիր արդյունավետության կապակցությամբ»,- ասաց նա:
Նիկոլ Փաշինյանը նշեց, որ գերագնահատվում է Ընտրական օրենսգիրքը: Նրա խոսքով՝ գործող ընտրական օրենսգրքի պայմաններում 2015թ. դեկտեմբերին սահմանադրական փոփոխություննրի հանրաքվեն կեղծվեց, այնինչ Հրազդանի քաղաքապետի ընտրությունների ժամանակ «Քաղաքացիական պայմանագիր» կուսակցությանը հաջողվեց պահել եւ արձանագրել իր թեկնածուին տրված ամեն քվեն, կանխել կրկնաքվեարկությունները, լցոնումները:
Նիկոլ Փաշինյանի խոսքով՝ ապագայի համար կարեւոր հենք է յուրաքանչյուրի քվեն պահելը, թեեւ բազմաթիվ մարդիկ փորձելու են ձայն տալ ընդդիմությանը, բայց չեն իմանալու՝ բազմապիսի ընդդիմություններից որն է այն ընդդիմությունը, որին պետք է ձայն տալ:
«Հայաստանում այնքան ընդդիմություն կա, որքան Ֆրանսիայում պանրի տեսականի: Բայց, իմ կարծիքով` պանրի այս տեսականուց շատ ավելի վատ հոտ է գալիս, բազմաթիվ ընդդիմության ինստիտուտը Հայաստանում պետք է վերանա»,- ասաց նա:
