Հայաստանի կառավարությունը Եվրոպական ներդրումային բանկից 51 մլն եվրոյի վարկ կստանա: Համապատասխան վարկային համաձայնագիրը հավանության է արժանացել ապրիլի 28-ի կառավարության նիստին:
Հայաստանի տրանսպորտի եւ կապի առաջին փոխնախարար Արթուր Առաքելյանը հայտնել է, որ միջոցները նախատեսված կլինեն Վանաձորից Ալավերդի եւ դեպի Վրաստանի սահման (Բագրատաշեն) 90 կմ-անոց ճանապարհի կապիտալ վերանորոգման համար:
Շինարարության ընդհանուր արժեքը 102 մլն եվրո է կազմում: Նախատեսվում է Զարգացման ասիական բանկին ներգրավել որպես եւս մեկ դոնոր: Ծրագրի շրջանակում նախատեսված է կապիտալ վերանորոգել ճանապարհագիծը, ինչպես նաեւ ամբողջությամբ վերանորոգել բոլոր կամուրջներն ու թունելները, մի շարք դեպքերում` նորերը կառուցել: Նախատեսված է աշխատանքը սկսել այս տարի եւ ավարտել մինչեւ 2020-ը: