Ֆրանսիական խորհրդարանի ստորին պալատը որոշում է կայացրել` կոչ անելով հրաժարվել Ռուսաստանի դեմ պատժամիջոցները երկարաձգելուց: Այդ մասին հաղորդագրությունը հինգշաբթի` ապրիլի 28-ին հրապարակվել է Ազգային ժողովի կայքում:
Քվեարկությանը 577 պատգամավորից 101-ն է մասնակցել: Նրանց մեծամասնությունը` 55 մարդ, քվեարկել է պատժամիջոցների վերացման օգտին, 44 մարդ դեմ է եղել, երկուսը ձեռնպահ են մնացել:
Որոշման նախագիծը մարտին խորհրդարանում քննարկման էր մտցրել պատգամավոր Թյերի Մարիանին, որը Վլադիմիր Յակունինի հետ հանդիսանում է «Ֆրանկո-ռուսական երկխոսություն» ասոցիացիայի համանախագահը, հայտնում է «Դոժդը»:
Որոշման հեղինակի` պատգամավոր եւ նախկին նախարար Թյերի Մարիանիի հետ քվեարկել են ոչ միայն «Հանրապետականներ» աջ-կենտրոնամետ կուսակցության իր գործընկերները, այլեւ ցենտրիստների, ձախականների ներկայացուցիչներ, ինչպես նաեւ մի շարք խորհրդարանականներ իշխող Սոցիալիստական կուսակցությունից, հայտնում է ՏԱՍՍ-ը: http://tass.ru.
Ֆրանսիայի Ազգային ժողովի որոշումը խորհրդատվական բնույթ է կրում: