Եթե Հայոց ցեղասպանությունը ճանաչվեր, հնարավոր է՝ հրեաների ցեղասպանություն տեղի չունենար: Այս մասին ասված է նացիստների որսորդներ, ֆրանս-հրեական ծագումով հայտնի ամուսիններ Սերժ եւ Բեատա Կլարսֆելդների հիշողություններում:
Ֆրանսիական Tribune Juive-ի փոխանցմամբ, Կլարսֆելդներին հաջողվել է գտնել ռազմական հանցագործ, նացիստ Կլաուս Բարբիին, որը հայտնի է «Լիոնի մսագործ» անունով: Ավելի ուշ նա կանգնել է դատարանի առջեւ եւ բանտում քաղցկեղից մահացել:
«Ես միշտ հանդես եմ եկել հայերի եւ օրենքի օգտին, որը ժխտման համար (ցեղասպանության - խմբ.) պատիժ է սահմանում: Ֆրանսիայի խորհրդարանը քվեարկեց այդ օրենքի օգտին, բայց հետո օրինագիծն ուղարկվեց Սահմանադրության խորհուրդ: Հանրապետության նախագահը խոստացել է այն նորից ներկայացնել:
Իսրայելը նույնպես խոստացել է ճանաչել Հայոց ցեղասպանությունը: Մինչեւ նա չճանաչի, դա չի անի նաեւ Թուրքիան:
Բազմաթիվ վկայություններ, փաստաթղթեր եւ հետազոտություններ են պահպանվել: Եթե այն դատապարտվեր 1919 թվականին՝ Վերսալում, ինչպես առաջարկում էին միջնորդները, ապա, հնարավոր է, հրեաների ցեղասպանություն տեղի չունենար: Այդ պատճառով բոլոր հիմքերը կան ճանաչելու հայերի ցեղասպանությունը, որը ծրագրված էր, ինչպես հրեաների ոչնչացումը»,- գրել են Կլարսֆելդները: