Կրեմլի դեմ բողոքները նորություն են Հայաստանում. դրանք սկսվեցին Ռուսաստանի, Իրանի եւ Թուրքիայի հետ սահմանակից Հարավային Կովկասում անկայունության ալիքի ֆոնին: Այս մասին գրում է International Business Times-ը:
Հայաստանի մայրաքաղաք Երեւանում վերջին ցույցի ընթացքում ակտիվիստ Դավիթ Սանասարյանը ձվեր նետեց Ռուսաստանի դեսպանատան ուղղությամբ: «Մեր բողոքը ոչ թե Ռուսաստան պետության, այլ Ռուսաստանի քաղաքականության եւ պուտինիզմի դեմ է»,- պարբերականին տված հարցազրույցում հայտարարել է Սանասարյանը:
«Հայաստանն ակնհայտորեն նյարդայնանում է եւ որոշակի իմաստով վստահ չէ Ռուսաստանի խաղի հարցում: Որոշները կարող են հարցնել, արդյո՞ք Հայաստանը Ռուսաստանի քավության նոխազը չէ մեծ խաղում, որը տարածաշրջանում վարում է Արեւմուտքի հետ»,- գրել է Լոնդոնում ճապոնական ֆինանսական հոլդինգի զարգացող շուկաների գծով մասնագետ Թիմոթի Էշը:
Հոդվածի համաձայն, անվտանգության ամենօրյա խնդիրը Երեւանին մանեւրելու քիչ տեղ է թողնում եւ, ինչպես երեւում է, այդ խնդիրը գերազանցեց Եվրոպայի հետ Հայաստանի սերտ տնտեսական եւ մշակութային կապերին:
«Փորձագետները նշում են, որ Հայաստանը հնարավոր դաշնակիցների քիչ ընտրություն ունի, եթե անգամ ձգտեր փոխարինել Ռուսաստանին այլ դաշնակցով: Ուկրաինայի իրադարձություններից հետո քիչ հավանական է, որ Միացյալ Նահանգներն ու Եվրամիությունը կկարողանան որեւէ նշանակալի անվտանգության երաշխիք առաջարկել Հայաստանին: Հարեւան Իրանը Հարավային Կովկասի առումով որոշակի հավակնություններ ունի: Իսկ Երեւանի եւ Անկարայի միջեւ դիվանագիտական հարաբերություններ չկան 1915 թվականին Օսմանյան կայսրությունում հայերի զանգվածային սպանությունների պատճառով, որը Թուրքիան հրաժարվում է որպես ցեղասպանություն ճանաչել»,- ամփոփել է հեղինակը:
