Հանրահայտ ռուս դիրիժոր եւ ջութակահար Վլադիմիր Սպիվակովն ու «Մոսկվայի վիրտուոզները» կամերային նվագախումբն ապրիլի 28-ին «Արամ Խաչատրյան» համերգասրահում ելույթ ունեցան երեւանյան հանդիսատեսի առջեւ (ֆոտոռեպորտաժ):
Առաջինը հնչեց Մոցարտի «Դիվերտիսմենտ №3 ֆա մաժոր»-ը, այնուհետեւ՝ Լուիջի Բոկերինիի «Ռե մինոր» սիմֆոնիան:
Մաեստրոյի հետ մեկ բեմում ելույթ ունեցավ նաեւ պատանի դաշնակահարուհի Ալեքսանդրա Ստիչկինան՝ գրավելով հանդիսատեսի ուշադրությունը: Երաժիշտների կատարմամբ հնչեց Հայդենի «Կոնցերտ դաշնամուրի №11 ռե մաժոր»-ը:
Նվագախումբը հանդես եկավ շուրջ երկու ժամ: Հանդիսատեսը երկար ժամանակ չէր ցանկանում հրաժեշտ տալ մաեստրոյին եւ երաժիշտներին երեք անգամ կրկին բեմ հրավիրեց:
Սպիվակովն ու «Մոսկվայի վիրտուոզները» նվագախումբը ելույթ կունենան նաեւ ապրիլի 29-ին: Կհնչեն Մոցարտի, Չայկովսկու, Ռոսինիի եւ Պիացոլլայի ստեղծագործությունները: