Երեւանի Ազատության հրապարակում Ամանորի գիշերը ոստիկանի նկատմամբ բռնություն կիրառելու մեջ մեղադրվող Գեւորգ Սաֆարյանի փաստաբանի ներկայացրած միջնորդությունները մերժվել են: NEWS.am-ի հետ զրույցում Տիգրան Հայրապետյանը նշեց, որ Երեւանի Ազատության հրապարակում, երբ դեպքը տեղի է ունեցել, տարածքում բազմաթիվ տեսախցիկներ են եղել, որոնք ֆիքսել են դեպքի մանրամասները, սակայն քննիչն ընդամենը մի տեսախցիկից է տվյալներ վերցրել, որը, սակայն, դատարկ է եղել:
«Տեսախցիկներ են եղել եւ Օպերայի շենքին փակցված, նաեւ մոտակայքում տեղադրված, որոնք քաղաքապետարանին, ստորգետնյա անցումներին ու սրճարաններին են պատկանում: Այսինքն, այդ մարմիններից քննիչն ընդամենը միայն մի տեսախցիկի տվյալներ է ստացել, այն էլ այն տեսախցիկի, որը նկարահանում է, բայց չի պահպանում, հիշողություն չունի: Դեպքի ժամանակ նաեւ ոստիկաններն են նկարել, իրենցից էլ ոչինչ չի վերցրել: Մի տեսագրություն է դրել գործում՝ 1 րոպեանոց: Քննիչը պետք է պարզեր, թե ինչու են նկարել, որտեղ են այդ տեսագրությունները: Միջնորդություն էր ներկայացվել այն մասին, որ քննիչը անկողմնակալ գործը չի կարող քննել, որովհետեւ Գեւորգ Սաֆարյանին տուժող ճանաչելու գործով նույնպես ինքն է քննիչը եղել եւ պարզվել է, որ ոստիկանների գործողություններն «օրինաչափ են եղել»: Քանի որ այդպիսի եզրահանգման է եկել այդ քննչական խումբը, ուրեմն չի կարող անաչառ գնահատական տալ Գեւորգ Սաֆարայանի գործողություններին»,-ասաց փաստաբանը:
Տիգրան Հայրապետյանը նաեւ նշեց, որ Գեւորգ Սաֆարայնը առողջական խնդիրներ ունի, որի մասին տեղեկացել է Հայաստանի նորանշանակ օմբուդսմենը.«Առողջական խնդիրներ ունի ոտքի հետ կապված, վերջերս օմբուդսմենն այցելել էր եւ տեղեկացել է, որ վիրահատական միջամտության կարքի կարող է առաջանալ: Ընդհանուր իր տրամադրվածությունը լավ է»:
Ավելի վաղ տեղեկացրել էինք, որ ամանորի գիշերը Երեւանի Ազատության հրապարակում ոստիկանի նկատմամբ ոչ վտանգավոր բռնություն գործադրելու մեջ մեղադրվող Հիմնադիր խորհրդարանի անդամ Գեւորգ Սաֆարյանի գործով մեղադրական եզրակացությունն ուղարկվել է դատախազին, մի քանի րից էլ կուղարկվի դատարան:
Հիշեցնենք, որ Երեւանի Ազատության հրապարակում Ամանորի գիշերը ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը: Գեւորգ Սաֆարյանին մեղադրանք է առաջադրվել ՔՕ 316-րդ հոդվածի 1-ին մասով՝ իշխանության ներկայացուցչի նկատմամբ բռնություն գործադրելը: Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
