Ազգային ժողովում Ընտրական օրենգրքի նախագծի քվեարկության ժամանակ իշխանություններն իջան մանր աճպարարությունների աստիճանի: Այս մասին, այսօր՝ ապրիլի 29-ին, ԱԺ-ում ճեպազրույցների ժամանակ նշել է ՀԱԿ խմբակցության ղեկավար Լեւոն Զուրաբյանը:
Նրա խոսքով, հենց իշխանությունների վրա է պատասխանատվությունը, որ հասարակությունն իրեն համախմբված համարի, որպեսզի նրա խնդիրները ծառայեն ազգային միասնությանը: Սակայն իշխանությունների ներկայացուցիչները խորհրդարանում ընդդիմությանը թույլ չտվեցին քվեարկությունից առաջ ելույթ ունենալ, որը կարող էր էականորեն ազդել քվեարկության արդյունքի վրա:
«Քանի որ իշխանությունները զրկեցին ընդդիմությանն այդ իրավունքից, նշանակում է Ընտրական օրենսգիրքը անօրինականորեն է ընդունվել: Երկրի համար միշտ կարեւոր է եղել, իսկ հիմա էլ ավելի կարեւոր է կոնսենսուսն իշխանության, ընդդիմության եւ հասարակության միջեւ: Մենք այդ գաղափարով ենք առաջնորդվել Ընտրական օրենգրքի քննարկումների ժամանակ, ինչպես նաեւ հիմա: Արտաքին վտանգի պարագայում մենք պետք է մի կողմ թողնենք քաղաքական տարաձայնությունները եւ գնանք ազգային միասնության»,-ընդգծել է Զուրաբյանը: