Քաղբանտարկյալների մշտադիտարկման ադրբեջանական կենտրոնը հրապարակել է քաղբանտարկյալների նոր ցուցակը, որում 103 մարդու անուն կա:
Հայտնում է, որ նոր ցուցակից հանվել են 14 քաղբանտարկյալների անունները, որոնց մարտի 17-ին համաներում էր շնորհվել, եւ եւս վեց մարդու անուն ( Ռաուֆ Միրկադիրով, Ինթիգամ Ալիեւ, Նազիմ Աղաբեկով ու երեք նուրսիստներ), որոնց պատիժը փոխարինվել է պայմանական պատժամիջոցով:
Նոր ցուցակում 8 լրագրող ու բլոգեր կա՝ Աբդուլ Աբիլովը, Նիջաթ Ալիեւը, Խադիջա Իսմայլովան, Սեյմուր Հազին, Արազ Գուլիեւը, Թոֆիգ Հասանովը, Ֆարաջ Քերիմովը ու Ռաշադ Ռամազանովը: Բացի դրանից ցուցակում կա նաեւ մեկ իրավապաշտպան դատապաշտպան՝ Ալիաբբաս Ռուստամովը, երիտասարդ ակտիվիստ, NİDA-ի անդամ Իլքին Ռուստամզադեն, ընդդիմադիր ակտիվիստներ Իլգար Մամեդովը, Ֆուադ Գախրամանլին, Մամեդ Իբրահիմը, Ասիֆ Յուսուֆլին, Գադիր Խուդաբախշին, Էլվին Աբդուլաեւը, Զեյնալաբդին Բագիրզադեն ու Նազիմ Մահմուդովը:
Կա նաեւ հավատացյալների մեծ խումբ, որը բաժանվում է մի քանի ենթախմբերի՝ Սաիդ Դադաշբեյլիի գործով դատապարտվածներ, Իսլամական կուսակցության առաջնորդ Մովսում Սամեդովի գործով դատապարտվածներ, այսպես կոչված հիջաբի բանտարկյալներ, որոնց ձերբակալել էին Մասալայում բողոքի ցույցերի համար, նուրսիստներ, աստվածաբաններ եւ այլն: Բացի դրանից ցուցակում ՕՊՕՆ-ի նախկին անդամներն են՝ ցմահ ազատազրկված Էլչին Ամիրասլանովը, Արիֆ Կազիմովը, Սաֆա Պոլադովը: Ցուցակում է նաեւ նախկին նախարար Ալի Ինսանովը ու Նիջատ Գուլիեւը: Եվս 25 նոր անուններն էլ Նարդարանյան իրադարձություններով մեղադրվողներն են: Քաղբանտարկյալների մշտադիտարկման կենտրոնի ղեկավար Էլշան Հասանովը պարզաբանել է, որ վերջինները ցուցակում ընդգրկվել են Եվրոպական հռչակագրի 2-րդ ( կտտանքների արգելք), 6-րդ (Արդար դատավարության իրավունք), 9-րդ (Մտքի, խղճի ու կրոնի ազատություն) հոդվածների խախտումների պատճառով: «Իրականում այս գործով կալանավորվածների թիվն ավելի մեծ է: Մենք ցուցակում ընդգրկել ենք միայն նրանց, ում գործերի մասին տեղեկություն ունենք»,- ասել է Հասանովը: