Ապրիլի 23-ին, ժամը 06.40-ին, ոստիկանության Կենտրոնականի բաժնում հաղորդում էր ստացվել, որ նույն օրը, ժամը 05.30-ից 06.00-ն ընկած ժամանակահատվածում, տեխնիկական միջոցների գործադրմամբ պատուհանը բացելով /1-ին հարկ/ «Սոս Սարգսյանի» անվան Համազգային թատրոնից գողացել են գումար, 2 դյուրակիր համակարգիչ եւ կիթառ:
Ոստիկանության մամուլի ծառայությունից NEWS.am-ին հայտնում են, որ ոստիկանության ծառայողների ձեռնարկած միջոցառումների արդյունքում, ապրիլի 29-ին, հիշյալ հանցանքը կատարելու կասկածանքով ոստիկանության Կենտրոնականի բաժին բերման են ենթարկվել 21-ամյա Գոռ Մ.-ն, 22-ամյա Հայկ Ս.-ն եւ 21-ամյա Բաբկեն Շ.-ն:
Խուզարկությամբ Հայկ Ս.-ի բնակարանում հայտնաբերվել են իրեղեն ապացույց հանդիսացող դյուրակիր 2 համակարգիչները:
Նշենք, որ նախնական տեղեկություններով` համազգային թատրոնի շենքից գողացել են համակարգիչներ եւ Արցախի Հանրապետության օգնության համար նախատեսված հանգանակության արկղը:
Հայաստանի քննչական կոմիտեի Երեւանի քննչական վարչության Կենտրոն եւ Նորք Մարաշ վարչական շրջանների քննչական բաժնում հարուցվել է քրեական գործ՝ ՔՕ 176 հոդվածի 2-րդ մասի (Կողոպուտ) հատկանիշներով: