Ալմաթիում ապրիլի 29-ին ձերբակալել են մի խումբ հասարակական գործիչների, որոնք նախատեսել էին մամուլի ասուլիս կազմակերպել` քաղաքի կենտրոնական հրապարակում համապետական խաղաղ հավաք անցկացնելու հայտ ներկայացնելու վերաբերյալ, սոցցանցերում հայտնում են տեղի ունեցածի ականատեսները:
Ազգային մամուլի ակումբը, որում պիտի տեղի ունենա միջոցառումը, նախօրեին հաղորդել էր, որ մամուլի ասուլիս է անցկացնելու «մայիսի 7-ին Հանրապետության հրապարակում «Պաշտպանենք հողը: Պաշտպանենք մայրենի լեզուն» թեմայով համապետական խաղաղ հավաք անցկացնելու վերաբերյալ Ալմաթի քաղաքի հաքիմաթ հայտ ներկայացնելու մասին»:
Ականատեսների տեղեկության համաձայն, ձերբակալությունն իրականացրել են արագ արձագանքման հատուկ ջոկատի մարտիկները: Ձերբակալվածների թվում են «Ժաս Ալաշ» թերթի գլխավոր խմբագիր Ռիսբեկ Սարսենբայը, հասարակական գործիչներ Մարժան Ասպանդիյարովան, Գալիմ Ագելեուովը, Ամիրջան Կոսանովը եւ ուրիշներ, հայտնում է «ՌԻԱ Նովոստին»:
Ավելի վաղ հաղորդվել էր, որ Ղազախստանի մի շարք քաղաքներում, ապրիլի 24-ից սկսած, տեղի են ունեցել չարտոնված հանրահավաքներ, որոնց մասնակիցները բողոքել են Հողային օրենսգրքում փոփոխությունների դեմ, որոնք նրանց կարծիքով թույլ են տալիս օտարերկրյա քաղաքացիներին հող վաճառել: Ղազախստանի նախագահ Նուրսուլթան Նազարբաեւը հայտնել է, որ տեղի է ունեցել «ապատեղեկատվության համառ տարածում ղազախական հողերն առաջիկայում իբր օտարերկրացիներին վաճառելու մասին» եւ «սադրիչները պիտի բացահայտվեն եւ պատիժ կրեն երկրի օրենքի համաձայն»: