Վրաստանի բնակչության 1/5-ը պատրաստ է քվեարկել իշխող «Վրացական երազանք» կոալիցիայի օգտին, եթե խորհրդարանական ընտրությունները կայանան առաջիկա կիրակի։ Նման արդյունքներ է ներկայացրել Միջազգային հանրապետական ինստիտուտը (IRI)։
Հարցման մասնակիցների 20 տոկոսը նախապատվությունը տվել է «Վրացական երազանքին», որը հետազոտության հրապարակման պահին արդեն բաժանվել էր առանձին կուսակցությունների։ Ընդդիմադիր «Միասնական ազգային շարժում» կուսակցության օգտին պատրաստ է քվեարկել հարցվածների 19 տոկոսը, փոխանցում է Newsgeorgia-ն։
Իրաքի Ալասանիայի «Ազատ դեմոկրատների» օգտին պատրաստ է քվեարկել հարցվածների 13 տոկոսը։ Շալվա Նաթելաշվիլիի «Լեյբորիստական կուսակցության» օգտին՝ 8 տոկոսը։ Նինո Բուրջանաձեի «Միավորված դեմոկրատական շարժում» կուսակցության օգտին պատրաստ է քվեարկել հարցվածների 3 տոկոսը։
Հարցվածների 17 տոկոսը չի կողմնորոշվել, թե ում օգտին է քվեարկելու։ Իսկ 15 տոկոսը բոլորին դեմ է։ Ընդ որում, հարցվածների 15 տոկոսը վստահ է, որ «Միասնական ազգային շարժումը» մյուս կուսակցություններից ավելի լավ կլուծի պետական խնդիրները։ «Վրացական երազանքի» դեպքում նման վստահություն է հայտնել հարցվածների 13, իսկ «Ազատ դեմոկրատների» դեպքում՝ 5 տոկոսը։