Հայաստանի «Ռուսալ-Արմենալ» փայլաթիթեղի գործարանում 2016 թվականի առաջին եռամսյակում արտադրության անկումը կազմել է 2.8%: Այս մասին նշված է ռուսական ՌՈՒՍԱԼ կոնցեռնի՝ 2016 թվականի առաջին եռամսյակի աշխատանքի արդյունքների մասին հաղորդագրությունում:
Բացարձակ ցուցանիշներով «Արմենալ»-ը հաշվետու ժամանակահատվածում 7.2 հազար տոննա փայլաթիթեղ է արտադրել:
«Արմենալ»-ում անկումը զգալիորեն ավելի քիչ է, քան ռուսական կոնցեռնի մյուս երեք ձեռնարկություններում՝ «Սայանալ», «Ուրալսկայա ֆոլգա» եւ «Սայանսկայա ֆոլգա» գործարաններում. այստեղ անկումը կազմել է, համապատասխանաբար, 27.9%, 18.6% եւ 18.2%:
Միաժամանակ, 2015 թվականի առաջին եռամսյակի համեմատ, «Արմենալ»-ում անկումը կազմել է 7.8%, «Սայանալ»-ում՝ 30.4%, «Ուրալսկայա ֆոլգա»-ում՝ 7.2%, իսկ «Սայանսկայա ֆոլգա»-ում (կոնցեռնի ամենամեծ ձեռնարկությունում) արտադրության ծավալներն ավելացել են 35.4%-ով:
Հիշեցնենք, որ 2015 թվականին ալյումինե փայլաթիթեղը Հայաստանի արտահանումից ստացված շահույթի առումով 5-րդ տեղում է: «Արմենալ» ընկերությունը (ՌՈՒՍԱԼ-ի դուստր ձեռնարկություն) ստեղծվել է Երեւանում, 2000 թվականի մայիսին, Քանաքեռի ալյումինի գործարանի բազայի վրա: Այն միակ ալյումինե փայլաթիթեղ արտադրողն է Կովկասում եւ Կենտրոնական Ասիայում:
