Ամերիկյան ինտերնետային վաճառքով զբաղվող Amazon կայքի հիմնադիր Ջեֆֆ Բեզոսի կարողությունը չորս ժամում ավելացել է 6 մլրդ դոլարով եւ կազմել է 60 մլրդ դոլար, հայտնում է Bloomberg-ը: Bloomberg Billionare Index առցանց վարկանիշային աղյուսակում Բեզոսը բարձրացել է չորրորդ հորիզոնական` շրջանցելով մեքսիկացի հեռահաղորդակցային մագնատ Կառլոս Սլիմին:
Ապրիլի 28-ին Amazon-ը հրապարակել է 2016-ի առաջին եռամսյակի ֆինանսական հաշվետվությունը: Ինտերնետային վաճառքի կայքը եռամսյակի ռեկորդային մաքուր եկամուտ է ցույց տվել. 2016-ի առաջին երեք ամսվա ընթացքում ցուցանիշը հասել է 513 մլն դոլարի` գրեթե կրկնակի գերազանցելով վերլուծաբանների ակնկալիքները: Եկամուտն աճել է 28 տոկոսով` հասնելով 29,1 մլրդ դոլարի, հայտնում է ՌԲԿ-ն:
Ռեկորդային արդյունքի վերաբերյալ լուրերի շնորհիվ բորսայում երկարացված առք ու վաճառքի ընթացքում Amazon-ի բաժնետոմսերի արժեքն աճել է գրեթե 13 տոկոսով: Ամբողջ ընկերության կապիտալիզացիան աճել է 38,2 մլրդ դոլարով:
Սլիմի կարողությունն ապրիլի 28-ին կրճատվել է 3,4 մլրդ դոլարով` հասնելով 55 մլրդ դոլարի, ինչը Բեզոսին թույլ է տվել Bloomberg-ի վարկանիշային աղյուսակում շրջանցել նրան:
Ապրիլի 28-ին եւս մի տեխնոլոգիական միլիարդատեր, աշխարհում խոշորագույն սոցցանցի` Facebook-ի հիմնադիրն ու գլխավոր տնօրեն Մարկ Ցուկերբերգը մի քանի ժամվա ընթացքում «թանկացել էր» 3,6 մլրդ դոլարով` հասնելով 51 մլրդ դոլարի: