Ապրիլի 28-ի լույս 29-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը շարունակել է խախտել կրակի դադարեցման պայմանավորվածությունը` կիրառելով տարբեր տրամաչափի հրաձգային զինատեսակներ, հրադադարի խախտման միջադեպեր են գրանցվել նաև հայ ադրբեջանակն սահմանում՝ Տավուշի ուղղությամբ:
Պաշտպանության նախարարության երեք պաշտոնյաներին հեռացնելը բավարար չէ: Ավելի լուրջ պաշտոնանկություններ են պետք՝ հայտարարել է պատգամավոր Հրանտ Բագրատյանը: Նախկին վարչապետը անցած տարիների ամենամեծ սխալն է համարում ռազմաարդյունաբերության վերացումը: Բագրատյանի խոսքով՝ կան զինատեսակներ, որ Հայաստանն ինքը պետք է արտադրի: Ապրիլյան պատերազմն ավելի վատ ելք կարող էր ունենալ, եթե հակառակորդը հարձակումն ավելի շուտ սկսեր:
«Սլավմեդ» կլինիկայում նախօրեին մահացած 37-ամյա ծննդկանը աղիների անանցանելիություն է ունեցել եւ բորբոքում՝ տեղեկացրել է առողջապահության նախարարությունը: Ուշագրավ է, որ հղիության ընթացքում Նաիրա Մուսայելյանը ոչ մի բողոք կամ հիվանդություն չի ունեցել, առաջնեկին ծննդաբերել է բնական ճանապարհով: Առաջին բողոքները հայտնվել են ծննդաբերությունից 26 ժամ անց, սկզբում բուժում են նշանակել, մեկ օր անց՝ վիրահատել, սակայն ծննդաբերությունից երեք օր անց մահացել է: Արդյոք կինը մահացել է բժշկական սխալի հետեւանքով, կպարզի քննությունը: Նորածինը առողջ է, դեռ բժիշկների հսկողության տակ:
Ավարտվել է Ավետիսյանների ընտանիքի սպանության մեջ մեղադրվող Վալերի Պերմյակովի ցուցմունքների հրապարակումը դատարանում: Ամբաստանյալը, որը հրաժարվել էր դատարանում ցումցունք, մի քանի հարցերի կարճ պատասխանել է: Ասել է, որ «Օդնոկլասնիկի» սոցցանցի իր էջում սատանայապաշտական գրառումներն ինքը չի արել: Կրկին հայտնել է, որ Ավետիսյաններին ինքն է սպանել, սակայն առաջվա նման հրաժարվել է պատասխանել այն հարցին՝ արդյոք ինքը մենակ է եղել: Դատապաշտպանի հարցին, թե ինչ կմտածեր մեկի մասին, որը յոթ մարդու է սպանել, Վալերի Պերմյակովը պատասխանել է, որ նման մարդուն խելագար կհամարեր, ընդ որում հավելել է, որ ինքն այդպիսին չէ:
Գայանե Մադաթյանը պատմել է անցած տարվա վրաերթի մասին, որի հետեւանքով ամուսինը մահացել էր, ինքը լուրջ վնասվածքներ ստացվել: Գայանեի ամուսինը՝ Ջրային տնտեսության պետական կոմիտեի աշխատակազմի նախկին ղեկավար Մհեր Մկրտումյանը, մահացել էր դեպքից չորս օր անց հիվանդանոցում: Ամբաստանյալ Գեւորգ Գեւորգյանը երեք ամիս խուսափել է նախաքննական մարմնից, նրա փոխարեն որպես տաքսու վարորդ է ներկայացել եղբայրը: Այդ պատճառով էլ նա այժմ երկու հոդվածով է մեղադրվում: Գեւորգը պնդում է, որ մեղավոր չէ, ամուսինները փողոցը հատել են անթույլատրելի հատվածով: Մկրտումյանի կինը, սակայն, կարծում է, որ Գեւորգն ալկոհոլի ազդեցության տակ է եղել ու գերազանցել արագությունը:
Չնայած «Եվրատեսիլի» կազմակերպիչները ի թիվս այլ երկրների դահլիճում արգելել են նաեւ Լեռնային Ղարաբաղի դրոշը, մեր մասնակիցը մտադիր է իր հետ Ստոկհոլմ տանել Արցախի դրոշը: Մրցույթին ընդառաջ իր երեւանյան ասուլիսում Իվետա Մուկուչյանը նաեւ ասել է , որ իր երգի սկզբի տողերը փոխել է աղոթքով՝ նվիրելով այն սահմանապահ հայ զինվորներին։ Եվրատեսիլ երգի մրցույթն այս տարի կմեկնարկի մայիսի 12-ին։ Մեր մանակիցը ելույթ կունենա առաջին կիսաեզրափակիչ փուլում, 7-րդ համարի ներքո։
Դոլարի ու ֆունտի փոխարժեքներն ապրիլի 29-ին նվազել են, իսկ եվրոյի ու ռուբլունը՝ աճել: Այսպիսով դոլարի փոխարժեքը կազմել է 478, եվրոյինը 544, ֆունտինը 698, ռուբլունը՝ 7.44 դրամ:
Երեւանում ապրիլի 30-ի երկրորդ կեսին եւ գիշերվա առաջին կեսին սպասվում է կարճատեւ անձրեւ եւ ամպրոպ: Օդի ջերմաստիճանը առաջիկա գիշեր կհասնի+10-ի, իսկ վաղը ցերեկը՝ +22 –ի: