Գյուղատնտեսության նախարարության ջրային տնտեսության պետական կոմիտեի աշխատակազմի ղեկավար Մհեր Մկրտումյանին ու կնոջը վրաերթի ենթարկելու մեջ մեղադրվող վարորդը՝ Գեւորգ Գեւորգյանը դեպքի օրն անտեղյակ է եղել, որ եղբայրն է ներկայացել որպես վարորդ: Այս մասին NEWS.am-ին ասաց նրա պաշտպան Գեորգի Մելիքյանը:
«Չի պատկերացրել, որ եղբայրը իր վրա է վերցրել մեղքը: Ինքը զանգել է եղբորը, կանչել է, ու միայն երբ արդեն դեպքի վայրից պետք է գնան, ինքը ուզել է քննիչների հետ գնա, եղբայրը չի թողել, ասել է՝ դու ընտաինք ունես, ես չէ»,- ասաց պաշտպանը:
Պաշտպանի խոսքով՝ Գեւորգ Գեւորգյանը մեղավորություն չունի, քանի որ Մկրտումյանները փողոցը անթույլատրելի հատվածից են հատել:
«Տեսանյութ կա, որում երեւում է, որ արգելված տեղից են անցել: Փողոցն անցնում են, ինքը երկրորդ գծով է երթեւեկում, առաջին մեքենան անցնում է, կողանցման ժամանակ հարվածում ա իրենց: Իրենք հոծ գծի վրա չեն եղել, եթե նման բան լիներ, փորձագետը կգրեր»,- ասաց պաշտպանը:
Նշենք, որ Մհեր Մկրտումյանի կինը՝ Գայանե Մադաթյանը պնդում է, որ իրենք հոծ գծի վրա են եղել վրաերթի ենթարկվելիս: Նա կասկածում է, որ վարորդը ալկոհոլի ազդեցության տակ է եղել, այդ պատճառով էլ մի քանի ամիս խուսափել է նախաքննական մարմնից:
Նշենք, որ ամուսինները վրաերթի էին ենթարկվել հոկտեմբերի 25-ին: Նրանք գանգուղեղային ծանր վնասվածքներ եւ բազմակի ոսկրային կոտրվածքներ էին ստացել: Հիվանդանոցում օրեր անց Մհեր Մկտրումյանը մահացել էր, կինը մոտ մեկ ամիս անց ապաքինվել, դուրս էր գրվել հիվանդանոցից:
Գեւորգ Գեւորգյանին մեղադրանք է առաջադրվել ՔՕ 242-րդ հոդվածի 2-րդ մասով (Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) եւ 244-րդ հոդվածով (ճանապարհատրանսպորտային պատահարի վայրը թողնելը):
Ըստ մեղադրանքի Գեւորգ Գեւորգյանը թույլ է տվել խախտում, հանդիպակաց ուղեմասով ընթացող ավտոմեքենաների լույսերից շլացած վիճակում շարունակել է երթեւեկությունը, ժամանակին կատարված արգելակումով չի կանգնեցրել ավտոմեքենան, տեխնիկական տեսակետից ստեղծել է վթարային իրադրություն, որի արդյունքում չի նկատել Վարդանանց փողոցի 69/5 հասցեի դիմացի ճանապարհահատվածով` իր երթեւեկության նկատմամբ աջից դեպի ձախ փողոցը հատող հետիոտններ Մհեր Մկրտումյանին եւ Գայանե Մադաթյանին, վրաերթի է ենթարկել նրանց: