Takata Ճապոնական ֆիրմայի արտադրության անվտանգության բարձիկների անսարքության պատճառով հետ կանչված մեքենաների ընդհանուր թիվը կարող է հասնել 100 մլն –ի: «Կիոդո»» լրատվական գործակալությունը հայտնում է, որ ԱՄՆ տրանսպորտային իշխանությունները ապագայում հավանաբար որոշում կկայացնեն ու կպահանջեն հետ կանչել բոլոր այն մեքենաները, որոնց անվտանգության բարձերի բացման համար օգտագործվում է ամոնիումի նիտրատ քիմիական միացությունը, հայտնում է ՏԱՍՍ-ը:
Բարձերի խնդիրների պատճառով ընդհանուր առմամբ արդեն շուրջ 60 մլն մեքենա է հետ կանչվել, նշում է «Կիոդոն»: Հետ կանչման ծրագրի ընդլայնման դեպքում դրա հետեւանքով ֆինանսական կորուստները կարող են հասնել 1 տրլն իենի ( շուրջ 9.3 մլրդ դոլարի), ինչը զգալի կորուստներ կպատճառի ճապոնական ավտոարտադրողներին, որոնք Takata անվտանգության բարձիկների հիմնական գնորդներն են:
Ճապոնական Takata ընկերությունը սկանդալի կենտրոնում է հայտնվել 2014-ին այն բանից հետո, երբ պարզվել է, որ նրա արտադրած անվտանգության բարձիկները կարող են կամայական բացվել ավտոմեքենայի շարժման ժամանակ: Հայտնում են, որ նման միջադեպերի պատճառով զոհվել է 10 մարդ, որոնցից 9-ը՝ ԱՄՆ-ից են:
