Աշխարհի խոշորագույն բանկերի վերլուծաբանները համարում են, որ առաջիկա շաբաթներին նավթի գները կնվազեն մինչեւ բարելի դիմաց 30 դոլարի:
Նավթը 70 տոկոսով աճել է հունվարի նվազագույնի համեմատ, դրա համար էլ շատ փորձագետների (օրինակ BP–ի վերլուծաբաններին ու Միջազգային էներգետիկ գործակալության մասնագետներին) թվում էր, թե ինդուստրիան սկսում է ուշքի գալ ծանր անկումից հետո, նշում է գործակալությունը:
Կա նաեւ այլ տեսակետ՝ Commerzbank, BNP Paribas եւ UBS Group-ում ներկա աճը համեմատում են անցած տարի շուկայում կատարվող իրադարձությունների հետ: Անցած գարնանը Brent –ի գները գերազանցում էին բարելի դիմաց 60 դոլարը, բայց արդեն մայիսին շուկայում առաջարկի ավելցուկի պատճառով գները սկսեցին նվազել:
BNP Paribas-ում եւ UBS –ում կարծում են, որ նավթը նորից հայտնվելու է այդ նույն ծուղակի մեջ:
«2015-ի իրավիճակի հետ վտանգավոր նմանություններ կան: Շուկան արդեն գերշիկացած է, իսկ կորեկցիան ուշանում է»,- համարում է հումքային շուկաների հետազոտությունների բաժնի ղեկավար Էուգեն Վայնբերգը:
Գործակալությունը նշում է, որ գների աճի վրա ազդել է անկայունությունը Նիգերիայում, Իրաքում ու Քուվեյթում, որտեղ գործադուլ էին անում նավթի ոլորտի աշխատակիցները: Կան խափանումներ նաեւ Կոլումբիայից ու Լիբիայից մատակարարումներում:
Հիմա Լիբիան արդյունահանում է օրական 330 հազար բարել նավթ, մինչդեռ 2011-ին այդ ցուցանիշը կազմել է 1.6 մլն բարել: Կոլումբայում արտադրությունը մարտին դեկտեմբերի համեմատ 8 տոկոսով նվազել է: Նիգերիայում արտադրության մակարդակը նվազել է մինչեւ յոթամյա նվազագույն՝ օրական 1.7 մլն բարել:
Բացի դրանից արտադրության ծավալների վրա ազդում են նաեւ այդ երկրներում զինյալների գործողությունները:
«Կոլումբիայում ձախ պարտիզաններին ու խռովարարներին ու Նիգերիայում զինյալներին հաջողվել է անել այն, ինչ չի հաջողվել աշխարհի խոշորագույն նավթարտադրողներին»,- մինչ այդ նշել էր գործակալությունը՝ նկատի ունենալով նավթարդյունահանման ծավալների սառեցման մասին Դոհայում ապրիլի 17-ին ՕՊԵԿ-ի ու Ռուսաստանի մասնակցությամբ բանակցությունների ձախողումը , հայտնում է «ՌԻԱ Նովոստին»:
