Ապրիլի 29-ի լույս 30-ի գիշերը երկու զինծառայող է զոհվել շփման գծում՝ հակառակորդի կողմից Թալիշի ուղղությամբ հրադադարի խախտման հետևանքով: 19-ամյա Գարիկ Մովսիսյանը եւ 48-ամյա Վազգեն Հարությունյանը: Հակառակորդը ղարաբաղա-ադրբեջանական շփման գծի ողջ երկայնքով կիրառել է հրաձգային զինատեսակներ, նաեւ 60 եւ 82 միլիմետրանոց ականանետեր ու տարբեր տիպի նռնականետեր: Պաշտպանության նախարարությունը հայտարարել է , որ հակառակորդի գործողությունները անպատասխան չեն մնալու, իսկ դրանց հետեւանքներն ընկնելու են ադրբեջանական կողմի վրա:
Հովիկ Աբրահամյանը ներկայացրել է Դատական ակտերի հարկադիր կատարման ծառայության նոր ղեկավարին՝ ժամանակավոր պաշտոնակատար Արմեն Հարությունյանին: Աշխատակազմի հետ հանդիպմանը մասնակցել է նաեւ օֆշորային սկանդալի հետեւանքով հրաժարական տված՝ ԴԱՀԿ նախկին ղեկավար Միհրան Պողոսյանը: Վարչապետը նրան շնորհակալություն է հայտնել անցած տարիների ընթացքում ծառայությունում իրականացված բարեփոխումների համար: Մինչեւ այդ Արմեն Հարությունյանը զբաղեցնում էր ՀՀ նախագահի ռեֆերենտի պաշտոնը:
Եվրոպական հեռարձակողների միությունը ներողություն է խնդրել իր հայտարարության համար, որով արգելվում էր «Եվրատեսիլ» երգի մրցույթում դահլիճ բերել Արցախի, Պաղեստինի, Ղրիմի ու Բասկերի, Կոսովոյի դրոշները: Եվրատեսիլի կազմակերպիչները կայքից հեռացրել են արգելված դրոշների ցանկը Իսպանիայի բողոքից հետո: Իսպանիայի իշխանությունները հիշեցրել են, որ Բասկերի երկրի դրոշը իրենց երկրի ինքնավար համայնքներից մեկի պաշտոնական խորհրդանիշն է և պահանջել էին շտկել այդ սխալը:
Հայտնի են դարձել բուհերի միասնական քննությունների օրերը՝ ըստ առարկաների: Առաջին քննությունը կլինի հունիսի 3-ին՝ «Կենսաբանություն», «Աշխարհագրություն», «Ընդհանուր պատմություն» առարկաներից: «Հայոց լեզու եւ գրականություն» առարկայի միասնական քննությունը կլինի հունիսի 7-ին, «Ֆիզիկան»՝ հունիսի 10-ին, «Օտար լեզուն»՝ հունիսի 14-ին, «Մաթեմատիկան»` հունիսի 17-ին, «Հայոց պատմությունը» եւ «Քիմիան»` հունիսի 21-ին, «Ռուսաց լեզուն»` հունիսի 24-ին: Երեւանում այս տարի կգործի տասը միասնական քննական կենտրոն:
Դոլարի փոխարժեքը նվազել է, ռուբլին, եվրոն եւ ֆունտը՝ աճել: Դոլարի փոխարժեքն այսօր կազմել է 476, ռուբլունը՝ 7,3, եվրոյինը՝ 542, ֆունտինը՝ 692 դրամ:
Երեւանում մայիսի 1-ին երկրորդ կեսին եւ գիշերվա առաջին կեսին սպասվում է կարճատեւ անձրեւ եւ ամպրոպ: Առաջիկա գիշերը մայրաքաղաքում օդի ջերմաստիճանը կհասնի+10-ի , իսկ վաղը ցերեկը՝+22-ի: