Օսմանյան կայսրությունում իրագործված Հայոց ցեղասպանության մասին հիշեցնող ցուցատախտակ կարելի է տեսնել ամերիկյան Ֆլորիդա նահանգի Բոկա-Ռաթոն փոքրիկ քաղաքում: Ազգությամբ հրեա նկարիչ, քանդակագործ եւ դիզայներ Յակով Գելլերը բաց երկնքի տակ պատկերասրահ է ստեղծել՝ այն կոչելով «Մարդկության այգի»: Այս մասին գրում է Newsblaze.com-ը:
Չնայած «Այլեւս երբեք» արտահայտությանը՝ ցեղասպանություններ են տեղի ունեցել Բոսնիայում, Կամբոջայում, Ռուանդայում: Բաց երկնքի տակ ստեղծված պատկերասրահը հիշեցում է համաշխարհային պատմության սարսափելի էջերի մասին:
Ցուցատախտակներից մեկը նվիրված է Հայոց ցեղասպանությանը: Դրա վրա հետեւյալ գրառումն է. «1915-23 թ.թ. Հայոց ցեղասպանություն. 1.5 մլն զոհ»: Ծառուղիներից մեկի վերջում նաեւ միջազգային հանրության կողմից Հայոց ցեղասպանության անտեսմանը նվիրված կառույց կա: Փոքրիկ շինության վրա խաչ է, ինչպես նաեւ հայկական ճարտարապետության խորհրդանիշերից մեկով՝ հավերժության նշանով ցուցանակ:
«Մարդկության այգու» կենտրոնում Դավթի աստղի տեսքով քանդակ է՝ անմար կրակով, որը նվիրված է 20-րդ դարի բոլոր ցեղասպանությունների հիշատակին. Հայոց ցեղասպանություն, Հոլոքոստ, ցեղասպանություններ Ռուանդայում, Բոսնիայում, Կամբոջայում: