ԱՄՆ-ում մայիսմեկյան ցույցերը քաղաքական բնույթ են ստացել. հարյուրավոր մարդիկ դուրս են եկել Լոս Անջելեսի փողոցներ՝ պահանջելով հարգել ներգաղթյալների եւ աշխատավորների իրավունքները: Նրանք իրենց բողոքն են հայտնել նախագահի հանրապետական թեկնածու, միլիարդատեր Դոնալդ Թրամփի հռետորության դեմ:
Գլխավոր «մայիսմեկյան» գործողությունները տեղի են ունեցել Քալիֆորնիայում, որտեղ արդեն շաբաթավերջին Թրամփի նախընտրական քարոզարշավի ընթացքում բողոքի ցույցեր ու երթեր են տեղի ունեցել:
«Ռեյթերսի» փոխանցմամբ, Լոս Անջելեսի կենտրոնում կիրակի տեղի ունեցած երթին մասնակցել է մի քանի հարյուր մարդ, մեծ մասամբ լատինամերիկացիներ եւ մեքսիկացիներ: Նրանց ձեռքին եղել են կարգախոսներ՝ «Տապալել Թրամփին» գրությամբ: Ցուցարարները հանդես են եկել ներգաղթային բարեփոխումներ իրականացնելու եւ արտաքսումից հրաժարվելու օգտին:
Խաղաղ ցուցարարների գլխավոր զենքը եղել է Թրամփի տեսքով փչովի տիկնիկը՝ սպիտակ գլխանոցը ձեռքում սեղմած (ուլտրաաջ «Կու կլուքս կլան» կազմակերպության հագուստի դետալ):
Քաղաքի ոստիկանության տեղեկատվությամբ, ցույցը կրել է խաղաղ բնույթ եւ ձերբակալություններ չեն եղել: