Միջազգային անվտանգության տեսակետից նախընտրելի է Լեռնային Ղարաբաղը Հայաստանի մաս ճանաչելը: Այս մասին մայիսի 2-ին լրագրողներին հայտնել է «Մոդուս Վիվենդի» հետազոտական կենտրոնի ղեկավար Արա Պապյանը:
Նրա կարծիքով բանակցություններին Լեռնային Ղարաբաղի մասնակցությունը քիչ հավանական է: Նույնիսկ եթե մյուս պետությունները ճանաչեն Լեռնային Ղարաբաղի Հանրապետությունը, Ադրբեջանը կարող է ասել՝ իսկ ես չեմ ճանաչում ու վերջ: Այնպես որ, ըստ փորձագետի, ավելի ճիշտ կլինի, եթե հասնենք նրան, որ ԼՂՀ-ն ճանաչվի Հայաստանի մի մասը: Իսկ Հայաստանը, Պապյանի խոսքով, պետք է ուժեղ երկիր լինի՝ այսինքն հավասարակշռի իր հարաբերությունները տարբեր պետությունների հետ ու ամրապնդի տնտեսությունը: «Իսկ Ադրբեջանին պետք է զրկել եկամուտնեի հիմնական աղբյուրից ու անհրաժեշտության դեպքում պարզապես հարվածներ հասցնել նավթամուղերին ու գազամուղերին»,- ասել է Արա Պապյանը: Փորձագետը նաեւ հավելել է, որ դիվանագիտական ճակատում պետք է հասնել նրան, որ ԵԱՀԿ Մինսկի խմբից դուրս մնան այն երկրները, որոնք միակողմանի հայտարարություններ են անում հակամարտության մասին: Խոսքը Թուրքիայի ու Բելառուսի մասին է:
