Գյումրիի Ավստրիական մանկական հիվանդանոցում մարտի 12-ին մահացած նորածնի ծնողները դժգոհ են հարուցված քրեական գործի ընթացքից: Նրանց խոսքով, դեպքից մեկ ու կես ամիս անց նշանակված փորձաքննության եզրակացությունն առայժմ չի ստացվել:
Մահացած նորածնի մայրը`Լիանա Դարբինյանը, NEWS.am-ի հետ զրույցում հայտնեց, որ մեկ օր առաջ իրեն քննիչը հայտնել է, որ կրկին պետք է արյան անալիզ հանձնի:
«Մենք արդեն 1 ամսից ավելի է՝ անորոշության մեջ ենք, քննիչը ոչ մի պատասխան մեզ չի ասել: Երբ զանգում ենք, ասում է՝ կամ պատասխան չի եկել, կամ գործը դեռ ավարտին հասցրած չէ: Գիտեք՝ ամենացավալին ու զավեշտալին ո՞րն է: Ինձ երեկ ասում էին՝ պետք է գնամ կրկին ԴՆԹ անալիզ տամ, հարցնում եմ՝ ինչու, ասում է՝ ձեր արյան հետ կապված խնդիր կա: Բայց թե ինչ խնդրի մասին է խոսքը, չի ասում»,- ասաց Լիանա Դարբինյանը:
Մահացած նորածնի հարազատները չեն վստահում նախաքննական մարմնին, ավելին, կասկածներ ունեն, որ ճիշտ եզրակացությունը չի գա. «Ինչ-որ բան այն չի, ուզում են՝ ինչ-որ բան սարքեն, մեզ համոզեն, որ անցնի, գնա: Ես մինչեւ վերջ պայքարելու եմ, որ ճշմարտությունը բացահայտվի: Քննիչն ասում է, որ հարցաքննել է բժիշկներին եւ ոչ մեկի ցուցմունքը մյուսին չի համապատասխանում: Ինձ համար պարզ է, որ այստեղ ինչ-որ բան են ուզում սարքեն»:
Լիանա Դարբինյանի պնդմամբ, իր երեխան թոքերի կամ սրտի հետ կապված խնդիր չի ունեցել. փոքրիկի մահվան պատճառը բժիշկների անփութությունն է:
Ավելի վաղ գյումրեցի Հակոբ Պետրոսյանը լրագրողներին պատմել էր, որ կինը ծննդաբերել է Գյումրիի բժշկական կենտրոնում կեսարյան հատումով: Վիրահատությունից հետո բժիշկները վստահեցրել են, որ թե որդու, թե կնոջ առողջական վիճակը բավարար է: Ավելի ուշ, սակայն, բժիշկները երեխային տեղափոխել են Ավստրիական հիվանդանոց տեղափոխել, որտեղ էլ ժամեր անց նորածինը մահացել է:
«Մարմինը, ձեռքերը այտուցված էին, հետո երբ որ բերեցին հիվանդանոց, բժիշկներն ասում էին՝ էս ինչ վիճակ է երեխի մոտ, ինչի է թոքերը սեղմած, ինչի են լխկել»,- պատմել էր Հակոբ Պետրոսյանը:
Մինչդեռ Գյումրու ծննդատան նորածնային բաժանմունքի վարիչ Ռոզա Ասլանյանը վստահեցրել էր, որ երեխան ծնվել է առողջական խնդիրներով եւ հաշված ժամերի ընթացքում վիճակն ավելի է վատացել. «Երեխան ծնվել է առողջական ծանր վիճակով, տնքոցներով, շնչառական անբավարարությունով, նշանակումները կատարվել են: Ժամը 02:30-ին ինձ զանգեց հերթապահող Նարինե Հովհաննիսյանը, ասաց՝ վիճակը վատ է, ասի՝ տեղափոխեք Ավստրիական մանկական հիվանդանոց. երեխային ժամը 5:00-ին տարել են այնտեղ, որտեղ մահացել է»,- ասել Ռոզա Ասլանյանը:
Գյումրու Ավստրիական մանկական հիվանդանոցի տնօրեն Աշոտ Կուրղինյանն էլ հայտնել էր, որ նորածինն իրենց մոտ է տեղափոխվել արդեն մահամերձ:
Հարուցվել է քրեական գործ: Կատարվում է քննություն:
