Երեւանի «Մալաթիա» տոնավաճառի մոտ նախորդ տարվա սեպտեմբերին նախկին կնոջը դանակի 30 հարվածով սպանելու մեջ մեղադրվող Արտակ Առաքելյանն այսօր՝ մայիսի 2-ին, Մալաթիա եւ Սեբաստիա վարչական շրջանների ընդհանուր իրավասության դատարանում հրաժարվեց իր հանրային պաշտպան Լյուդվիգ Ավետիսյանի ծառայություններից:
«Չեմ վստահում, ուզում եմ նոր պաշտպան ունենալ»,- հայտարարեց նա:
Պաշտպանը լրագրողների հետ զրույցում ասաց, որ իր համար անակնկալ էր ամբաստանյալի որոշումը: Իր ծառայություններից հրաժարվելը նա բացատրեց նրանով, որ չի մասնակցել ամուսիններին պատկանող իրերի գույքագրմանը:
«Հավանաբար երեւի չեմ գնացել գույքը կիսեմ, դրա համար է հրաժարվում: Բայց իմ պարտականությունների մեջ չի մտնում գնալը: Ես քրեական գործով պաշտպանություն իրականացնելու համար եմ նշանակված, իսկ իրենք երեւի ազգուտակի բոլոր պրոբլեմները կապում են ինձ հետ»,- ասաց նա: Արտակ Առաքելյանը դատարանում հայտարարեց, որ ինքը պաշտպան է վարձելու: Դատական նիստը հետաձգվեց մինչեւ նոր պաշտպանի ներգրավումը:
Հիշեցնենք, որ 2015թ. սեպտեմբերի 27-ին` ժամը 15.00-ին սահմանում «Մալաթիա» տոնավաճառի մոտ դանակահարություն էր տեղի ունեցել: 38-ամյա Հեղինե Դարբազյանը մահացել էր ստացած` դանակի 30-ից ավելի հարվածներից: Սպանությունը գործելու մեղադրանքով կալանավորվել է կնոջ նախկին ամուսինը` 40-ամյա Արտակ Առաքելյանը, որը խոստովանել է, որ կնոջը սպանել է խանդի հողի վրա:
Արտակ Առաքելյանին մեղադրանք է առաջադրվել ՔՕ 104-րդ հոդվածի 1-ին մասով (սպանություն), 235-րդ հոդվածի 4-րդ մասով (ապօրինի կերպով զենք կրել): Նրան մինչեւ 20 տարի ազատազրկում է սպառնում: Արտակ Առաքելյանն իրեն մեղավոր է ճանաչել: