ԵԱՀԿ-ի Մինսկի խմբին անհրաժեշտ է օժտել Լեռնային Ղարաբաղի Հանրապետության եւ Ադրբեջանւ զինված ուժերի շփման գծում մշտական մոնիտորինգ իրականացնելու լիազորությամբ: Այդ մասին մայիսի 2-ի մամուլի ասուլիսին հայտնել է Հայաստանի Ազգային Ժողովի նախկին պատգամավոր Հովհաննես Իգիթյանը:
Նրա խոսքով, այսօր առայժմ չկա Ադրբեջանին զսպող մեխանիզմ, բացառությամբ ԼՂՀ պաշտպանության բանակի: «Ադրբեջանը չի ուզում նստել բանակցությունների սեղանի շուրջ: Պետք է զսպման մեխանիզմ լինի, որը Բաքվին կստիպի հրաժարվել ռազմական լուծումից: Ամեն դեպքում բանակցությունները պիտի վերսկսվեն Լեռնային Ղարաբաղի մասնակցությամբ», - ընդգծել է Իգիթյանը: Այսօրվա դրությամբ, շարունակել է նա, պարզ է, որ պիտի փոխվեն բանակցությունների որոշակի կետեր. կետ չկա ԵԱՀԿ Մինսկի խմբի մշտական մոնիտորինգի մասին: «Խոսքը խաղաղապահ ուժեր մտցնելու մասին չէ, այլ մոնիտորինգ է անհրաժեշտ, որպեսզի պարզվի, թե ով է ագրեսորը, ով է խախտում հրադադարի ռեժիմը», - նշել է Իգիթյանը: Ռուսաստանը, հավելել է նախկին պատգամավորը, հստակորեն գիտակցում է, որ Ադրբեջանն է սկսել ռազմական գործողությունները: «ԵԱՀԿ Մինսկի խմբի շրջանակից դուրս Ռուսաստանը պիտի հայտարարեր, որ գոնե ափոսոսում է, որ Ադրբեջանը իրենց զենքն օգտագործել է դաշնակցի դեմ», - ամփոփել է Հովհաննես Իգիթյանը: