Ադրբեջանի ագրեսիայի հետեւանքով որոշ խնդիրներ առաջացան տնտեսության, այդ թվում՝ գյուղատնտեսության մեջ: Այս մասին, մայիսի 1-ին, հադրութցի ֆերմերների հետ հանդիպման ժամանակ նշել է Արցախի վարչապետ Արայիկ Հարությունյանը: Նա գյուղացիների հետ քննարկել է ստեղծված իրավիճակում թիկունքային ապահովվածության, գարնանացանի, հունձի եւ հակահրդեհային աշխատանքների հետ կապված հարցեր:
ԼՂՀ Կառավարությունից NEWS.am-ին հայտնում են, որ վարչապետն իր խոսքում կարեւորել է Ադրբեջանի վերջին շրջանի ագրեսիայի պայմաններում թիկունքային աշխատանքների արդյունավետ կազմակերպումը, ինչն ուղիղ կերպով ազդեցություն է թողնում բանակի մարտունակության վրա: Նա հորդորել է ներկաներին փոխհամաձայնեցված աշխատանքներ իրականացնել այդ ուղղությամբ՝ օգտագործելով համայնքների ողջ ներուժը:
«Ինչպես տեսնում ենք, Ադրբեջանի ագրեսիայի հետեւանքով որոշ խնդիրներ առաջացան տնտեսության, այդ թվում՝ գյուղատնտեսության մեջ: Իհարկե, շնորհիվ մեր բանակի՝ շատ արագ կարողացանք կայունացնել ռազմական իրավիճակը, սակայն այժմ պետք է լծվենք թե թիկունքի ամրացման, թե տնտեսության բնականոն աշխատանքների կազմակերպման գործերին: Թեեւ որոշ ժամկետների մասով ուշացել ենք, սակայն դեռեւս ժամանակ կա գարնանացան որոշ կուլտուրաների մշակման համար: Այնպես որ ակնկալում եմ ձեզնից օպերատիվ եւ արդյունավետ աշխատանք, իսկ կառավարությունը հնարավորինս կաջակցի հողագործների ջանքերին»,- նշել է վարչապետը:
Խորհրդակցության ժամանակ քննարկվել են նաեւ հունձի նախապատրաստմանն ու հրդեհների կանխարգելմանն ուղղված աշխատանքների հետ կապված հարցեր: Գործադիրի ղեկավարը տվել է համապատասխան հանձնարարականներ՝ գյուղտեխնիկայի արդյունավետ կիրառման եւ հրդեհավտանգ խոտածածկերի վերացման վերաբերյալ:
Հանդիպմանը ներկա փոխվարչապետ Արթուր Աղաբեկյանն անդրադարձել է համայնքներում կամավորական աշխատանքների անհրաժեշտությանը, որոնց միջոցով պետք է հատկապես այս օրերին աջակցել կարիքավոր բոլոր ընտանիքներին՝ փոխարինելով առաջնագծում գտնվող նրանց անդամներին:
