Սլովակիայի Ազգային խորհրդի (խորհրդարանի) նախագահ եւ հանրապետության կառավարական կոալիցիայի կազմի մեջ մտնող Սլովակիայի ազգային կուսակցության առաջնորդ Անդրեյ Դանկոն երկուշաբթի դուրս է գրվել Բրատիսլավայում Ազգային ուռուցքաբանական ինստիտուտից: Հանրապետության առաջատար կլինիկայում ապրիլի 25-ին նրան վիրահատել են` հեռացնելով ստամոքսի ուռուցքը, հայտնում է ՏԱՍՍ-ը:
«Հիստոլոգիական անալիզները քաղցկեղը չհաստատեցին եւ ես հետագա ուռուցքաբանական բուժման կարիք չունեցա,- լրագրողներին հայտնել է խորհրդարանի նախագահը: Ես կուզեի իմ պարտականությունների կատարմանը վերադառնալ երկու շաբաթվա ընթացքում: Տանը երկար հետվիրահատական հանգիստ չեմ նախատեսել»:
Միաժամանակ, բուժող բժիշկները պնդում են, որ խորհրդարանի նախագահն առնվազն երկու շաբաթ տանը մնա: Նրան դեղեր եւ խստագույն սննդակարգ են նշանակել: Նրանց կարծիքով, նա կկարողանա աշխատանքի վերադառնալ բժշկական ռեաբիլիտացիայից հետո: Գուցե առողջարանային բուժում անհրաժեշտ լինի:
Անդրեյ Դանկոն հիվանդանոց էր տեղափոխվել ապրիլի 24-ին: Նրա աշխատանքային ծրագիրը չեղյալ է համարվել մինչեւ մայիսի կեսը: Խորհրդարանի նախագահի պարտականությունները ժամանակավորապես կատարում է աջ-կենտրոնամետ «Կամուրջ» կուսակցության առաջնորդ Բելա Բուգարը: