«Հայկական վերածնունդ» համասփյուռքյան կազմակերպության Փարիզի մասնաճյուղի համակարգող, «Հիմնադիր խորհրդարանի» պատգամավոր Շանթ Ոսկերչյանը, որի մուտքը ՀՀ արգելված էր 2015 թ. մայիսից եւ ապրիլի 27-ին մուտքի արգելքը վերացվել էր, անհամբեր է` երբ է գալու Երեւան. արդեն գնել է տոմս, սակայն, դեռ չգիտի` երբ կլինի Հայաստանում: NEWS.am-ի հետ զրույցում նա ասաց, որ իր համար անսպասելի է եղել այդ որոշումը եւ դեռ չի հավատում, որ կարող է այցելել Հայրենիք եւ մասնակցել նրա հասարակական-քաղաքական կյանքին:
«Անհամբեր եմ, սպասում եմ Երեւան գալուն, կարոտել եմ Հայաստանը` ամենաշատը օդին ու ջրին: Ուզում եմ գալ, քայլել փողոցներով, տեսնել, զրուցել մեր քաղաքացիների հետ: Անսպասելի որոշում էր ինձ համար, ինչպես կամայականորեն որոշումը կայացրին, կամայակոներեն էլ հետ քաշվեցին»,-ասաց Շանթ Ոսկերչյանը:
Հիշեցնենք, որ ՀՀ Վարչական դատարում քննվող՝ Շանթ Ոսկերչյանն ընդդեմ ՀՀ ԱԱԾ-ի գործով դատական նիստի ժամանակ ապրիլի 27-ին, ԱԱԾ ներկայացուցիչը գրավոր փաստաթուղթ է ներկայացրել, որի համապատասխան Շանթ Ոսկերչյանի տվյալները ապրիլի 25-ից հանվել են ՀՀ տարածքում անցանկալի օտարերկրացիների տվյալների բանկից: