Բաղրամյան պողոտայում ապրիլի 22-ին, «Մենք ենք տերը մեր երկրի» նախաձեռնության ակցիայի ժամանակ լրագրողների հետ կապված միջադեպի առնչությամբ ոստիկանության երեք աշխատակից ենթարկվել է կարգապահական տույժի: Այս մասին իր ֆեյսբուքյան էջում գրառում է կատարել ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանը:
«Ապրիլի 22-ին Բաղրամյան պողոտայում տեղի ունեցած՝ լրագրողների հետ կապված միջադեպի առնչությամբ ՀՀ ոստիկանության պետ Վլադիմիր Գասպարյանի հրամանով նշանակված ծառայողական քննությունն ավարտվել է: Ծառայողական քննության արդյունքներով ոստիկանության ՊՊԾ գնդի 3-րդ գումարտակի հրամանատարի տեղակալը, նույն գումարտակի դասակի հրամանատարը և շարքային ոստիկան ենթարկվել են կարգապահական տույժի»,- գրել է նա:
Հիշեցնենք, որ ապրիլի 22-ին «Մենք ենք տերը մեր երկրի» նախաձեռնության անդամները Ազատության հրապարակում ընթերցել էին Նախագահական նստավայրին ուղղված իրենց պահանջները եւ երթով ցանկացել էին հասնել Բաղրամյան 26, սակայն ոստիկանները թույլ չէին տվել:
Ցուցարարները դիմել էին խորամանկության, նրանք Ազատության հրապարակից մեկ այլ կողմից դուրս են եկել Մաշտոցի պողոտա, եւ խումբ-խումբ շարժվել դեպի Բաղրամյան պողոտա: Սակայն Բաղրամյան պողոտայի հենց սկզբին ոստիկանները շղթա էին կազմել եւ թույլ չէին տվել որեւէ մեկը բարձրանա վերեւ: Բախումներ էին տեղի ունեցել եւ 42 քաղաքացի վարչական ձերբակալման էր ենթարկվել: Բերման ենթարկվածների մեջ կային նաեւ լրագրողներ, որոնք հետագայում ահազանգել էին ոստիկանների կողմից բռնությունների մասին: