Արցախա-ադրբեջանական շփման գծում տեղի ունեցած քառօրյա պատերազմը ցույց տվեց, որ Հայաստանում պատերազմական իրավիճակներում լրագրողներին ճիշտ աշխատել սովորեցնելու հրատապ խնդիր կա: Այս մասին այսօր` ապրիլի 3-ին, լրագրողների հետ զրույցում ասաց տեղեկատվական անվտանգության փորձագետ Սամվել Մարտիրոսյան:
«Մենք տեսանք, որ սահմանագիծ մեկնած լրագրողներից շատերը չգիտեին` ինչն է ենթակա հրապարակման, ինչը` ոչ: Այս առումով կա հրատապ խնդիր, որպեսզի լրագրողները ուղեցույց ունենան, քանի որ պատերազմական իրավիճակում աշխատող լրագրողը կարող է մի հրապարակումով մեծ վնաս տալ սահմանում գտնվող զինվորներին»,-ասաց նա:
Սամվել Մարտիրոսյանի խոսքով` չնայած այդ խնդիրներին, հայաստանյան լրատվամիջոցները քառօրյա պատերազմի շրջանում լավ են աշխատել. «Ավելորդ բաներ չէին գրում, զուսպ էին, բայց հենց լարվածությունն ընկավ` զգոնությունն անցավ, մտանք էմոցիոնալ դաշտ: Խնդիրն այն է, որ մեր տեղեկատվական դաշտում ահռելի քանակի չլրատվամիջոցներ կան` «հրատապ լուրեր», «թարմ լուրեր» գրելով փորձում են քլիքներ հավաքել: Մյուս խնդիրն այն է, որ բանակն սկսում է ավելի քիչ տեղեկատվություն տալ, մարդիկ հոգեբանորեն պատերազմական իրավիճակում են գտնվում տեղեկատվություն ստանալու կարիք ունեն»,-ասաց նա:
Սամվել Մարտիրոսյանը նշեց, որ խնդիր է նաեւ այն, որ քառօրյա պատերազմից հետո Հայաստանը դադարեց աշխատել արտասահմանյան լրատվամիջոցների հետ, մինչ դեռ Ադրբեջանն աշխատում է եւ իրեն ներկայացնում զոհի դերում. «Մենք արտասահմանյան մամուլի հետ շատ իմպուլսիվ ենք աշխատում, հիմա դեպի դուրս հոսքեր շատ քիչ են, դրսի լրագրողների հետ անընդհատ աշխատելու դրվածք չունենք: Ադրբեջանն այժմ փորձում է զոհի դերում լինել, դրսից լրատվամիջոցներ է բերել, ավերածությունները ցույց են տալիս եւ այլն»:
