«Երրորդմասցի Լյովիկի»` Լեւոն Ղազարյանի եւ նրա երկու ընկերների սպանության մեջ մեղադրվող Վահան Հակոբյանը (Գաստիկ), Սարգիս Հախանումյանը (Տլե) ու Սարգիս Գրիգորյանը (Ծգլ) տեւական ժամանակ խնդիրներ են ունեցել միմյանց հետ եւ գժտված են եղել:
Այսօր` մայիսի 3-ին, Էրեբունի եւ Նուբարաշեն վարչական շրջանների ընդհանուր իրավասության դատարանում գործով դատախազը, ներկայացնելով մեղադրական եզրակացության եզրափակիչ մասը, հայտնեց, որ 2014թ.-ի մայիսին կողմերը միմյանց հետ վիճել են մայրաքաղաքի սրճարաններից մեկում, որից հետո Վահան Հակոբյանն ու ընկերները որոշել են վրեժխնդիր լինել:
«Երրորդմասցի Լյովիկի եւ ընկերներից վրեժխնդիր լինելու համար ամբաստանյալները նախ տուն են վարձել, ապա ձեռք բերել ավտոմեքենա եւ ինքնաձիգներ:
2015թ.-ի մարտի չորսին Վահան Հակոբյանն ու ընկերները տեղեկացել են, որ «Երրորդմասցի Լյովիկը» Դրաստամատ Թադեւոսյանի հետ գնալու է «Նուբարաշեն» քրեակատարողական հիմնարկ` տեսակցելու Դավիթ Իսպիրյանին: Երիտասարդները դեռեւս առավոտյան 10:50-ի սահմաններում եկել են ՔԿՀ եւ դարանակալել: Մինչեւ Լեւոն Ղազարյանի եւ Դրաստամատ Թադեւոսյանի ժամանելը` տարածք է եկել նրանց անվտանգությունն ապահովող Մեսրոպ Նազարյանցը, որը ոչինչ չի նկատել:
Ժամեր անց քրեակատարողական հիմնարկ են եկել Լեւոն Ղազարյանն ու Դրաստամատ Թադեւոսյանը, որոնց է մոտեցել նաեւ Մեսրոպ Նազարյանցը: Անմիջապես մեքենայից դուրս են եկել Վահան Հակոբյանը, Սարգիս Հախանումյանն ու Սարգիս Գրիգորյանը, որոնք ավելի քան 82 փամփուշտ են արձակել Լեւոն Ղազարյանի եւ ընկերների ուղղությամբ: Մեսրոպ Նազարյանցը մահացել է տեղում, իսկ Լեւոն Ղազարյանն ու Դրաստամատ Թադեւոսյանը` «Էրեբունի» բժշկական կենտրոնում:
Վահան Հակոբյանն ու ընկերներն անմիջապես թողել են ավտոմեքենան եւ ինքնաձիգները դեպքի վայրում եւ ոտքով հեռացել: Սկզբում երիտասարդները գնացել են Նոր Նորքի երկրորդ զանգված, ապա գնացել Ավան- Առինջ եւ որոշ ժամանակ մնացել Կարեն եւ Սուրեն Երեմյաններին պատկանող «Միլենա» տաքսի ծառայության գրասենյակ: Այնուհետեւ Վահան Հակոբյանն ու ընկերները գնացել են իրենց վարձակալած տունը:
Մարտի վեցին երիտասարդները հանձնել են վարձակալած տունը եւ հեռացել:
Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1-ին, 6-րդ, 7-րդ կետերով: Խափանման միջոց է ընտրվել կալանավորումը:
Դատական նիստը շարունակվում է: