Թուրքիան Բունդեսթագին նախազգուշացնում է Օսմանյան կայսրությունում հայերի ջարդերին վերաբերող բանաձեւում չօգտագործել ցեղասպանություն բառը։ Այս մասին հայտնում է Rheinischer Post պարբերականը՝ մեջբերելով Գերմանիայում Թուրքիայի դեսպան Հուսեյն Ավնի Քարսլըօղլուին։
«Դա ազգային խորհրդարանի որոշելու բանը չէ։ Պատմությանը գնահատականներ տալը Բունդեսթագի առաջադրանքը չէ»,- ասել է դեսպանը եւ զգուշացրել, որ բանաձեւում ցեղասպանություն եզրն օգտագործելը կարող է վտանգի տակ դնել հայ-թուրքական հարաբերությունների հետագա կարգավորումը։
«Ցեղասպանությունը հստակորեն սահմանվում է Ժնեւի կոնվենցիայով։ Դրա մասին կարող է որոշում կայացնել միայն միջազգային դատարանը։ Քաղաքական գործիչները գործում են քաղաքական կամ կրոնական մոտիվներով։ Դա կարող է վտանգել հայ-թուրքական հաշտեցման գործընթացը»,- ասել է դեսպանը։
Հիշեցնենք, որ ապրիլին Երեւան կատարած այցի ժամանակ Բունդեսթագի պատգամավոր, Արտաքին հարաբերությունների հարցերով խորհրդարանական հանձնաժողովի անդա Քրիսթոֆ Բերգներն ասել էր, որ հունիսի սկզբին Բունդեսթագում քննարկվելու է բանաձեւի նախագիծը, որը հաստատելու է, որ այն ինչ մեկ դար առաջ հայերի հետ կատարվել է Օսմանյան կայսրությունում իրականում ցեղասպանություն էր։
