Որեւէ հասցեական հայտարարությունների բացակայության պայմաններում հայկական կողմը պատրաստ է կիրառել ոչ միայն համարժեք, այլեւ անհամարժեք ուժ, որպեսզի վերջապես ապահովվի Լեռնային Ղարաբաղի Հանրապետության անվտանգությունը: Այս մասին մայիսի 3-ին մամուլի ասուլիսի ժամանակ ասել է ՀՀԿ պատգամավոր, Կրթության, գիտության, մշակույթի ու սպորտի հարցերով մշտական խորհրդարանական հանձնաժողովի նախագահ Արտակ Դավթյանը:
Նրա խոսքով իր զորքերի ու սպառազինությունների կուտակումներից հետո Ադրբեջանը հայտարարում է, որ Ղարաբաղը իր տարածքն է, ու նրանք կարող են այնտեղ անել ինչ կամենան: «Սա հրաշալի հայտարարություն է մեր հետագա գործողությունների համար: Եվ հետո՝ հրաշալի էր Ռուսաստանի վարչապետի հայտարարությունն այն մասին, որ հիմա կարեւոր չէ, թե ով է սկսել ռազմական գործողությունները: Եթե կարեւոր չէ, որ Ադրբեջանն է պատերազմ սկսում, ուրեմն հայկական կողմերը չեն սպասի, թե երբ են նրանք նորից մոտենալու մեր սահմաններին»,- շեշտել է Դավթյանը: ԼՂՀ Սահմանադրության մեջ, շարունակել է պատգամավորը, ամրագրված է, որ երկրի տարածքը կազմում է 12 հազար քառակուսի մետր: Վերոնշյալ հայտարարությունները, պարզաբանեց նա, պարզապես հնարավորություն կտան, որ այդ 12 հազար քառակուսի մետրը դառնան 20, 25 կամ 30 հազար: