Եվրահանձնաժողովն իր գարնանային կանխատեսումներում 2016-ի համար Brent տեսակի նավթի գինը բարձրացրել է գրեթե 15 տոկոսով՝ մինչեւ 41.7 դոլար մեկ բարելի դիմաց։ Նախորդ՝ ձմեռային կանխատեսումների համաձայն՝ մեկ բարել նավթը 2016-ին արժենալու էր 35.8 դոլար, փոխանցում է «ՌԻԱ Նովոստի»-ն։

2017-ի կանխատեսումները նույնպես աճել են՝ մինչեւ 45.95 դոլար մեկ բարելի դիմաց։

«Brent տեսակի նավթի գների վերականգնումը պայմանավորված էր ՕՊԵԿ-ի եւ կազմակերպության անդամ չհանդիսացող երկրների մատակարարումների կրճատումով։ ՕՊԵԿ անդամ որոշ երկրներում արդյունահանման մակարդակի իջեցումը միայն մասամբ է փոխհատուցվել Իրանի արտադրության աճով։ Թեպետ արդյունահանումը ռեկորդային ծավալների է եղել, Ռուսաստանն ու Սաուդյան Արաբիան փետրվար-մարտին արդյունահանումը կայուն են պահել»,- ասված է փաստաթղթում։

Եվրահանձնաժողովը նշում է, որ նավթի համաշխարհային պաշարների բարձր մակարդակը եւ զարգացող շուկաներում տնտեսական աճի շուրջ մտահոգությունները հավանաբար կշարունակեն ճնշում գործադրել նավթի գների վրա։