Արցախի Մարտակերտի շրջանի Թալիշ գյուղից քառօրյա պատերազմի հետեւանքով Հայաստան է տեղափոխվել շուրջ 80 ընտանիք, որոնք բնակվում են Հանրապետության տարբեր քաղաքներում եւ գյուղերում: Այս մասին NEWS.am-ի թղթակցին ասաց Թալիշի գյուղապետ Վիլեն Պետրոսյանը:
«Հայաստան է տեղափոխվել շուրջ 350 մարդ, որոնք բնակություն են հաստատել տարբեր տեղերում: Մոտ 160 մարդ էլ այժմ Ստեփանակերտում է»,- ասաց գյուղապետը:
Հայաստան տեղափոխված թալիշցներն այսօր սոցիալական եւ կացարանի խնդիրներ ունեն: Գյուղից հեռանալիս թալիշցիները չեն հասցրել ոչինչ վերցնել իրենց հետ եւ այսօր առաջին հերթին առաջին անհրաժեշտության իրերի եւ զբաղվածության խնդիր ունեն. նրանց մեծ մասը բնակվում է հարազատների մոտ:
Ավելի քան 3 շաբաթ Հայաստանում ապրելուց հետո միայն Չարենցավան էր այցելել Արցախի աշխատանքի ու սոցիալական հարցերի նախարարության պատասխանատուները, որոնք էլ այնտեղ բնակվող թալիշցիների հետ քննարկել են նրանց հետագա բնակության հետ կապված հարցեր:
Միեւնույն ժամանակ, Հայաստանում Լեռնային Ղարաբաղի մշտական ներկայացուցիչ Կարլեն Ավետիսյանը մեզ հետ զրույցում ասել էր, որ դեռ հստակ որոշում չունեն, քննարկում են տարբեր առաջարկներ: