Հայաստանում ոչ մի կուսակցություն չի առանձնանում, բոլորը միանման են։ Այս մասին մայիսի 3-ին՝ մամուլի ասուլիսի ժամանակ, ասել է ԲՀԿ խմբակցության պատգամավոր Լյովա Խաչատրյանը՝ անդրադառնալով հարցին, թե ԲՀԿ-ն ընտրակաշառք բաժանե՞լ է, թե՞ ոչ։ Նրա խոսքով՝ խաղի կանոններն այնպիսին պիտի լինեն, որ դրա կարիքը չլինի։ «Դա պետք է անթույլատրելի լինի։ Բոլորն առաջնորդվում են խաղի միանման կանոններով»,- նշել է նա։
Մամուլի ասուլիսի մեկ այլ մասնակից, ԱԺ ՀՀԿ պատգամավոր Սուքիաս Ավետիսյանն ասաց. «Երբ մոտենում են ընտրությունները, բոլորին թվում է, թե միայն իշխանությունն է պատասխանատու դրա համար։ Եվ, ցավոք, շատ քաղաքական ուժեր մի կողմ են քաշվում՝ փորձելով մեղադրել իշխանությանը։ ԸՕ նախագծի քննարկումները ցույց տվեցին, որ մարդիկ, որոնք ժամանակին քաղաքական դաշտ քաղաքական շահարկումներ են բերել, իրենք են փորձում խոսել դրանց արմատախիլ անելու մասին։ Ինչպես ստեղծել եք, այդպես էլ վերացրեք»։