Հայաստանի օմբուդսմենը պատրաստ է ընդլայնել համագործակցությունը ՄԱԿ-ի հետ: Այս մասին, այսօր՝ մայիսի 3-ին, ՄԱԿ-ի մշտական համակարգող, ՄԱԶԾ մշտական ներկայացուցիչ Բրեդլի Բուզետտոյի հետ աշխատանքային հանդիպման ժամանակ նշել է ՀՀ Մարդու իրավունքների պաշտպան Արման Թաթոյանը:
ՄԻՊ-ից NEWS.am-ին հայտնում են, որ հանդիպման ընթացքում քննարկվել են մարդու իրավունքների պաշտպանության երաշխիքների օրենսդրական եւ գործնական ամրապնդմանը վերաբերող հարցեր: Քննարկվել են նաեւ Մարդու իրավունքների պաշտպանի աշխատակազմի, եւ մասնավորապես՝ մարզային ստորաբաժանումների կարողությունների զարգացման հարցեր:
Բուզետտոն պատրաստակամություն է հայտնել երկկողմ համագործակցության շրջանակում իրականացնել համատեղ ծրագրեր:
Արման Թաթոյանը, ընդգծելով Մարդու իրավունքների պաշտպանի ինստիտուտի կարողությունների ամրապնդման եւ զարգացման գործում Միավորված ազգերի կազմակերպության, մասնավորապես՝ ՄԱԿ-ի Զարգացման ծրագրի դերը, հաստատել է մարդու իրավունքների պաշտպանության ոլորտում համատեղ ծրագրեր նախաձեռնելու, համագործակցության ոլորտներն ընդլայնելու իր պատրաստակամությունը:
