Հայաստանի եզդիական համայնքը դիմել է ՀՀ նախագահ Սերժ Սարգսյանին՝ ազգությամբ եզդի գործարար, բարերար Ջնդի Ամարյանի գործով օրինականություն ապահովելու եւ նրան ազատ արձակելու խնդրանքով:
Նամակում մասնավորապես ասված է.
«Հայաստանի եզդի ազգաբնակչությունը խորապես մտահոգված է «Շամս» մարդասիրական ՀԿ պատվավոր նախագահ Ջնդի Մահմադի Ամարյանին ազատությունից զրկելու եւ նրա նկատմամբ ապօրինի քրեական հետապնդում սկսելու փաստից:
Հիշեցնենք, որ մեր ազգակից, հիշյալ կառուցի պատվավոր նախագահ Ջնդի Մահմադի Ամարյանին մեղադրանք է առաջադրվել ՀՀ քրեական օրենսգրքի 182-րդ հոդվածի 3-րդ մասի 2-րդ կետով (շորթում), եւ 02.04.2016 թվականից նա գտնվում է անազատության մեջ: Ձեռնպահ մնալով իրավական գնահատականներից, համոզված լինելով նրա անմեղության մեջ՝ Հայաստանի եզդի ազգաբնակչությունը խնդրում է Ձեզ հետեւողականություն ցուցաբերել Ջնդի Մահմուդի Ամարյանի վերաբերյալ քրեական գործի նկատմամբ եւ թույլ չտալ պետական կառույցներին անհիմն քրեական հետապնդում իրականացնել:
Խնդրում ենք Ձեր միջնորդությունը նրա նկատմամբ իրականացված ապօրինի կալանավորումն անհապաղ դադարեցնելու հարցում: Ամենակարեւորը` խնդրում ենք եւ պահանջում հետեւողականություն ցուցաբերել օրենքի տառի պահպանմանը, հակառակ պարագայում՝ ստիպված ենք մեր ձայնը բարձրացնել եւ հրապարակային բողոք ներկայացնել՝ փողոց դուրս գալով»:
Նամակն ուղարկվել է նաեւ ՀՀ գլխավոր դատախազին, ՀՀ Քննչական կոմիտեի ղեկավարին եւ Մարդու իրավունքների պաշտպանին: Նամակը ստորագրել են եզվիտական գրեթե բոլոր կազմակերպությունները, Հայաստանի բոլոր եզվիտական գյուղերի գյուղապետերը եւ ակնկալում ենք, որ ՀՀ նախագահը հետեւողականություն կցուցաբերի եւ թուլ չի տա պետական կառույցներին անօրինականություն գործել: