Ամերիկացի բարձրաստիճան պաշտոնյաները չափազանց հաճախ են նվազեցնում վարչակարգերի կողմից մարդու իրավունքների ոլորտում լուրջ խախտումների նշանակությունը: Այդ մասին ասված է «The Washington Post»-ի խմբագրական հոդվածում:
Հեղինակների խոսքով, դա հատկապես վերաբերում է ադրբեջանցի լրագրողուհի Խադիջա Իսմայիլովային, որը զբաղվում է Իլհամ Ալիեւի ընտանիքում կոռուպցիաների հետաքննությամբ: Հոդվածում ընդգծվում է, որ նրա խոսքերը հաստատվել են վերջերս հրապարակված պանամական փաստաթղթերում:
Իսմայիլովան հորինված մեղադրանքներով դատապարտվել է 7 ու կես տարվա ազատազրկման: «Նա ոչ միայն հետապնդվող լրագրող է, այլեւ մեկը, ով աշխատել է ԱՄՆ-ի կողմից ֆինանսավորվող եւ խոսքի արտահայտման ազատությանը նվիրված ռադիոկայանում: Այնուամենայնիվ, Օբամայի վարչակարգը թույլ է արձագանքել դրան»,- ասված է հոդվածում:
Հեղինակները նշում են, որ Պետդեպը հայտնել է, որ «ԱՄՆ-ը անհանգստացած է» ձերբակալությամբ, սակայն Ալիեւի Վաշինգտոն այցի ընթացքում Պետքարտուղար Ջոն Քերիի եւ փոխնախագահ Բայդենի հետ տիկին Իսմայիլովայի գործի մասին ոչինչ չի ասվել:
«Այս դեպքը ցույց է տալիս, թե ինչու պիտի Կոնգրեսը հավանություն տա մարդու միջազգային իրավունքների խախտումների մասին օրինագծին: Օրինագիծը, որը հայտնի է որպես Մագնիտսկու ակտ, ԱՄՆ-ին հնարավորություն կտար պատժամիջոցներ մտցնել ցանկացած օտարերկրյա անձի դեմ, որը խախտումներ է թույլ տալիս մարդու իրավունքների պաշտպանների կամ այն անձանց դեմ, որոնք ձգտում են բացահայտել պետական պաշտոնյաների կողմից իրականացվող անօրինական գործունեությունը»,- նշված է հոդվածում:
Օբամայի վարչակազմը դիմադրել է Մագնիտսկու սկզբնական ակտի ներդրմանը, բայց այդ ժամանակվանից հրապարակայնորեն պատժամիջոցներ է սահմանել 39 ռուսաստանցու նկատմամբ` օրենքի դրույթներին համապատասխան: Եթե օրենքն ընդունվի, կկարողանա ճնշում գործադրել ապագա վարչակազմերի վրա` Իսմայիլովայի դեպքի նման դեպքերում միջոցներ ձեռք առնելու նպատակով:
Հոդվածում նշվում է, որ Մագնիտսկու ակտը Սենատում ընդունվել է դեկտեմբերին եւ ակնկալվում է դրա քննարկումը Ներկայացուցիչների պալատում: Համալիր մոտեցման դեպքում օրենքը կարող է վերաբերել Պետքարտուղարությանը եւ գանձատանը, եւ ոչինչ Սպիտակ տանը չի խանգարի նախաձեռնություններով հանդես գալ ցեղասպանության եւ այլ հիմնական իրավունքների խախտման դեպքում: