Մալաթիայի նախկին թաղապետ Վահան Զատիկյանի որդու՝ 26-ամյա Սեդրակ Զատիկյանի սպանության գործով մեղադրյալ Նարեկ Խաչատրյանը սպանությունից հետո եւ առաջ սպանության հետ առնչվող որեւիցե մեկի հետ հեռախոսազրույց չի ունեցել: Այս մասին այսօր` մայիսի 3-ին, Երեւանի Մալաթիա-Սեբաստիա վարչական շրջանների ընդհանուր իրավասության դատարանում դատական նիստից հետո NEWS.am-ի հետ զրույցում ասաց գործով ամբաստանյալ Նարեկ Խաչատրյանի պաշտպան Վարդուհի Էլբակյանը:
«Մեղադրողը հրապարակեց այն բոլոր հեռախոսակապերը, որոնք միմյանց հետ սպանությունից առաջ եւ հետո խոսել են: Սակայն, Նարեկ Խաչատրյանն այդ բաժանորդների ցանկում չկա եւ հաջորդ դատաքննությանը միջնորդություն կներկայացնենք, որ կոնկրետ Նարեկ Խաչատրյանի հեռախոսազանգերը հրապարակվեն, որը չգիտես` ինչու մեղադրանքի հիմքում չի դրվել»,-ասաց փաստաբանը:
Նշենք, որ այսօրվա դատական նիստին հետազոտվեցին քրեական գործում առկա նյութերը` հրապարակվեցին դեպքի վայրի զննության արդյունքները, դիակի դատաբժշկական փորձաքննության եզրակացությունը, սպանությունից առաջ եւ հետո դեպքի հետ առնչություն ունեցող բաժանորդների հեռախոսակապերը:
Ավելի վաղ հայտնել էինք, որ Մալաթիա-Սեբաստիա վարչական շրջանի նախկին թաղապետ Վահան Զատիկյանի տղան՝ 26-ամյա Սեդրակ Զատիկյանը սպանվել է 2006թ. հունիսի 22-ին Սեբաստիա եւ Տիչինա փողոցների խաչմերուկում՝ «ԱԿՍ» տեսակի ինքնաձիգից արձակված կրակոցների հետեւանքով: Նույն վայրում կրակոցներից մահացել է նաեւ անցորդ, 42-ամյա Կարինե Սարգսյանը:
Գործով 15 տարվա ազատազրկման է դատապարտվել Ստեփան Հակոբյանը, որը ԱԺ նախկին պատգամավոր Հակոբ Հակոբյանի (Լեդի Հակոբ) եղբորորդին է, որն ըստ մեղադրական եզրակացության՝ Նարեկ Խաչատրյանի հետ նախնական համաձայնությամբ Սեդրակ Զատիկյանի սպանությունը պատվիրել է Արսեն Առուշանյանին, որը դատապարտվել է ցմահ ազատազրկման։ Արսեն Առուշանյանը Նարեկ Խաչատրյանի գործով վկայի կարգավիճակում է, եւ կալանավայրում արտագնա նիստում կհարցաքննվի։
